លម្អិតពីកណ្ដាប់ដៃដែករបស់លោកស្នងការ ឈឿន សុចិត្ត បំបែកសំណុំរឿងចាប់ជំរិតក្មេងស្រីអាយុ៥ឆ្នាំ បណ្ដាលឱ្យស្លាប់ ឃាត់ខ្លួនជនសង្ស័យជាពូសាច់ថ្លៃ

(កណ្ដាល)៖ ករណីចាប់ជំរិតក្មេងស្រីអាយុ៥ឆ្នាំមួយករណី ដែលបានធ្វើឱ្យមហាជនមានការភ្ញាក់ផ្អើល និងសោកស្ដាយយ៉ាងខ្លាំង នៅឃុំព្រែកអំបិល ស្រុកស្អាង ខេត្តកណ្ដាល ត្រូវបានកម្លាំងសមត្ថកិច្ចជំនាញនៃស្នងការដ្ឋាននគរបាលខេត្តកណ្ដាល បើកការស្រាវជ្រាវយ៉ាងយកចិត្តទុកដាក់ រហូតឈានដល់ការឃាត់ខ្លួនជនសង្ស័យបានម្នាក់ ក្នុងរយៈពេលដ៏ខ្លី។

យោងតាមសេចក្ដីប្រកាសព័ត៌មានរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្ដាល បានឱ្យដឹងថា ករណី «ចាប់ ឃុំឃាំង និងបង្ខាំងដោយខុសច្បាប់មានស្ថានទម្ងន់ទោស (ចាប់ជំរិតបណ្ដាលឱ្យជនរងគ្រោះស្លាប់)» បានកើតឡើងនៅវេលាម៉ោង ៨ និង៣០នាទីព្រឹក ថ្ងៃទី១០ ខែឧសភា ឆ្នាំ២០២៦ នៅចំណុចផ្ទះរបស់ជនសង្ស័យ ស្ថិតក្នុងភូមិកូនជ្រែ ឃុំព្រែកអំបិល ស្រុកស្អាង ខេត្តកណ្ដាល។

ប្រតិបត្តិការនេះ ធ្វើឡើងក្រោមការបញ្ជាផ្ទាល់ពីឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម គួច ចំរើន អភិបាលខេត្តកណ្ដាល ដោយលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានដឹកនាំកម្លាំងជំនាញបើកការស្រាវជ្រាវយ៉ាងសកម្ម រហូតឈានដល់ការឃាត់ខ្លួនជនសង្ស័យឈ្មោះ គីម វណ្ណា ភេទប្រុស អាយុ៣៥ឆ្នាំ មុខរបរមិនពិតប្រាកដ ត្រូវជាពូសាច់ថ្លៃរបស់ជនរងគ្រោះ។

ជនរងគ្រោះមានឈ្មោះ រតនា ម៉េងស៊ីម ភេទស្រី អាយុ៥ឆ្នាំ រស់នៅភូមិកំពង់សំណាញ់ទី១ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល។ តាមការបញ្ជាក់ពីសមត្ថកិច្ច គ្រួសារជនរងគ្រោះ តែងតែនាំកុមារីរងគ្រោះទៅលេងជីដូនជីតា នៅភូមិកូនជ្រែ ឃុំព្រែកអំបិល ជារៀងរាល់ថ្ងៃសៅរ៍ និងថ្ងៃអាទិត្យ ដែលស្ថិតនៅទល់មុខផ្ទះជនសង្ស័យ។

នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានធ្វើសកម្មភាពចាប់ ឃុំឃាំង និងបង្ខាំងជនរងគ្រោះតែម្នាក់ឯង ពិតប្រាកដមែន។ ចំពោះមូលហេតុ ជនសង្ស័យអះអាងថា ដោយសារមានគំនុំផ្ទាល់ខ្លួន ព្រោះត្រូវបានម្តាយជនរងគ្រោះមើលងាយ និងមិនព្រមឱ្យខ្ចីប្រាក់។

ក្នុងប្រតិបត្តិការនេះ សមត្ថកិច្ចបានដកហូតវត្ថុតាងរួមមាន ទូរសព្ទដៃម៉ាក Nokia អិនចុចពិល ពណ៌ខៀវ ចំនួន១គ្រឿង និងទូរសព្ទដៃម៉ាក OPPO ពណ៌ខ្មៅ ចំនួន១គ្រឿង។ ចំណែកលទ្ធផលតេស្តទឹកនោមរកសារធាតុញៀនរបស់ជនសង្ស័យ គឺអវិជ្ជមាន។

បច្ចុប្បន្ន ជនសង្ស័យត្រូវបានសមត្ថកិច្ចកសាងសំណុំរឿង បញ្ជូនទៅចាត់ការតាមនីតិវិធីច្បាប់ ខណៈករណីនេះបានបង្កការភ្ញាក់ផ្អើល និងក្ដីសោកស្ដាយយ៉ាងខ្លាំងពីសំណាក់សាធារណជន និងអ្នកប្រើប្រាស់បណ្ដាញសង្គម៕