ករណីចាប់ជំរិតក្មេងស្រីនៅស្រុកស្អាង បញ្ចប់ដោយសោកនាដកម្ម ខណៈសមត្ថកិច្ចខេត្តកណ្ដាលបើកប្រតិបត្តិការក្ដៅគគុកចុះបង្រ្កាប ឃាត់ខ្លួនជនសង្ស័យបានម្នាក់

(កណ្ដាល)៖ ករណីចាប់ជំរិតក្មេងស្រីដ៏រន្ធត់មួយ ដែលបានកើតឡើងនៅស្រុកស្អាង ខេត្តកណ្ដាល កាលពីថ្ងៃទី១០ ខែឧសភា ឆ្នាំ២០២៦ បានបញ្ចប់ទៅដោយសោកនាដកម្ម បន្ទាប់ពីក្មេងស្រីរងគ្រោះត្រូវបានគេរាយការណ៍ថា បានបាត់បង់ជីវិតយ៉ាងអាណោចអាធម្ម បង្កឱ្យមានការភ្ញាក់ផ្អើល និងសោកស្តាយយ៉ាងខ្លាំងពីសំណាក់មហាជន។

តាមប្រភពព័ត៌មានពីកន្លែងកើតហេតុ បានឱ្យដឹងថា ជនសង្ស័យបានធ្វើសកម្មភាពចាប់បង្ខំក្មេងស្រីរងគ្រោះយកទៅបាត់ មុននឹងផ្ញើសារទាមទារប្រាក់ពីក្រុមគ្រួសារចំនួន ១០,០០០ ដុល្លារអាមេរិក ជាថ្នូរនឹងការដោះលែង។ ក្នុងសារគម្រាមនោះ ជនល្មើសបានកំណត់ពេលឱ្យក្រុមគ្រួសារត្រឹមតែ ១ម៉ោងប៉ុណ្ណោះ ដើម្បីរកប្រាក់មកប្រគល់ និងបានព្រមានមិនឱ្យរាយការណ៍ទៅសមត្ថកិច្ចឡើយ បើមិនដូច្នោះទេ នឹងបង្កគ្រោះថ្នាក់ដល់ជីវិតក្មេងស្រី។

ទោះជាយ៉ាងណា ក្រោយទទួលបានព័ត៌មានភ្លាមៗ កម្លាំងសមត្ថកិច្ចជំនាញនៃស្នងការដ្ឋាននគរបាលខេត្តកណ្ដាលបានបើកប្រតិបត្តិការក្ដៅគគុកចុះស្រាវជ្រាវយ៉ាងយកចិត្តទុកដាក់ និងឈានដល់ការបង្ក្រាប ព្រមទាំងឃាត់ខ្លួនជនសង្ស័យបានម្នាក់ ដើម្បីយកមកសាកសួរ និងកសាងសំណុំរឿងបញ្ជូនទៅតុលាការ ចាត់ការតាមនីតិវិធីច្បាប់យ៉ាងតឹងរ៉ឹងបំផុត។

ជុំវិញករណីដ៏ខ្លោចផ្សានេះ មហាជនបានសម្ដែងការសោកស្តាយ និងអាណិតអាសូរយ៉ាងខ្លាំងចំពោះក្រុមគ្រួសារសពក្មេងស្រីរងគ្រោះ ព្រមទាំងថ្កោលទោសយ៉ាងដាច់អហង្ការចំពោះទង្វើដ៏ឃោរឃៅ និងអមនុស្សធម៌របស់ជនល្មើស ដែលបានបំផ្លាញអនាគតកុមារីវ័យក្មេងម្នាក់យ៉ាងសាហាវព្រៃផ្សៃ។

ក្រោយទទួលដំណឹងដ៏ក្រៀមក្រំនេះ គណៈគ្រប់គ្រងសាលា អ្នកគ្រូ កុមារា កុមារី និងអាណាព្យាបាលកុមារទាំងអស់ បានចូលរួមសម្ដែងនូវមរណទុក្ខយ៉ាងក្រៀមក្រំបំផុត ជាមួយក្រុមគ្រួសាររបស់កុមារី រដ្ឋណា ម៉េងស៊ីន ដែលបានទទួលមរណភាពដោយអំពើឃាតកម្ម កាលពីថ្ងៃទី១០ ខែឧសភា ឆ្នាំ២០២៦។

ក្នុងសាររំលែកទុក្ខនោះ បានសម្ដែងការអាណិតអាសូរយ៉ាងជ្រាលជ្រៅចំពោះលោក លោកស្រី ជាមាតាបិតា និងសាច់ញាតិទាំងអស់ ដែលបានបាត់បង់កូនបង្កើត ចៅ និងក្មួយជាទីស្រឡាញ់ ព្រមទាំងបានបួងសួងឧទ្ទិសដល់វិញ្ញាណក្ខន្ធកុមារី រដ្ឋណា ម៉េងស៊ីន ឱ្យបានទៅកាន់សុគតិភព កុំបីឃ្លៀងឃ្លាតឡើយ៕