អភិបាលខេត្តកណ្តាលព្រមានច្បាស់ៗថា ដីគ្មានប័ណ្ណកម្មសិទ្ធិនៅស្រុកពញាឮ មិនអាចទិញលក់បានទៀតឡើយ!

(កណ្តាល)៖ ឯកឧត្តម គួច ចំរើន អភិបាលខេត្តកណ្តាល បានប្រកាសយ៉ាងច្បាស់ថា «ចាប់ពីពេលនេះតទៅ ដីធ្លីក្នុងស្រុកពញាឮ ដែលគ្មានប័ណ្ណកម្មសិទ្ធិស្របច្បាប់ មិនអាចក្លាយជាកម្មវត្ថុនៃការទិញលក់បានទៀតឡើយ ព្រោះអាចជាដីមិនស្របច្បាប់ ដីមានវិវាទ ឬជាដីសាធារណៈរបស់រដ្ឋ ខណៈការចុះបញ្ជី និងចែកប័ណ្ណកម្មសិទ្ធិជូនប្រជាពលរដ្ឋត្រូវបានបញ្ចប់រួចរាល់»។ ការបញ្ជាក់នេះ ធ្វើឡើងក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋ ៥២ភូមិ សរុប ៣៧,៥០៩បណ្ណ ក្នុងឃុំចំនួន៨ នៃស្រុកពញាឮ នាព្រឹកថ្ងៃទី៨ ខែឧសភា ឆ្នាំ២០២៦។

ឯកឧត្តមអភិបាលខេត្តបានសង្កត់ធ្ងន់ថា អាជ្ញាធរមូលដ្ឋានមិនត្រូវចេញលិខិតបញ្ជាក់ពាក់ព័ន្ធដីធ្លីក្រៅពីប័ណ្ណកម្មសិទ្ធិដែលបានចុះបញ្ជីរួចនោះទេ ដើម្បីទប់ស្កាត់ការទិញលក់ខុសច្បាប់ និងកាត់បន្ថយវិវាទដីធ្លី។

ជាមួយគ្នានេះ ឯកឧត្តមក៏បានអំពាវនាវដល់ប្រជាពលរដ្ឋឱ្យមកទទួលប័ណ្ណកម្មសិទ្ធិឱ្យបានគ្រប់គ្នា និងត្រូវគោរពនីតិវិធីច្បាប់ក្នុងការសាងសង់សំណង់ផ្សេងៗ ខណៈអ្នកសារព័ត៌មានក៏ត្រូវប្រកាន់ខ្ជាប់វិជ្ជាជីវៈ និងផ្ទៀងផ្ទាត់ព័ត៌មានឱ្យបានច្បាស់លាស់មុនផ្សព្វផ្សាយ ដើម្បីរក្សាកិត្តិយស និងសេចក្តីថ្លៃថ្នូរវិជ្ជាជីវៈ៕