បំបែកសំណុំរឿងចាប់បង្ខាំង និងជំរិតទារប្រាក់! អាវុធហត្ថខេត្តព្រះសីហនុ សង្គ្រោះស្ត្រីជនជាតិចិនម្នាក់ និងឃាត់ខ្លួនជនសង្ស័យ៦នាក់

(ព្រះសីហនុ)៖ កម្លាំងកងរាជអាវុធហត្ថខេត្តព្រះសីហនុ បានបើកប្រតិបត្តិការយ៉ាងសកម្ម បំបែកសំណុំរឿងពាក់ព័ន្ធនឹងអំពើចាប់បង្ខាំងមនុស្សដោយខុសច្បាប់ ជំរិតទារប្រាក់ ជួញដូរមនុស្ស និងបទល្មើសគ្រឿងញៀន ដោយបានជួយសង្គ្រោះស្ត្រីជនជាតិចិនម្នាក់ និងឃាត់ខ្លួនជនសង្ស័យជាជនជាតិចិនចំនួន៦នាក់។

ប្រតិបត្តិការនេះធ្វើឡើងក្រោមការបញ្ជាផ្ទាល់ពីថ្នាក់ដឹកនាំកងរាជអាវុធហត្ថលើផ្ទៃប្រទេស និងក្រោមការសម្របសម្រួលនីតិវិធីពីតំណាងអយ្យការអមសាលាដំបូងខេត្តព្រះសីហនុ បន្ទាប់ពីទទួលបានពាក្យបណ្ដឹងពីបុរសជនជាតិចិនម្នាក់ថា មិត្តស្រីរបស់ខ្លួនត្រូវបានក្រុមជនល្មើសចាប់បង្ខាំង និងជំរិតទារប្រាក់។

បន្ទាប់ពីទទួលព័ត៌មានភ្លាម កម្លាំងជំនាញបានចុះប្រតិបត្តិការស្រាវជ្រាវ និងឈានទៅឃាត់ខ្លួនជនសង្ស័យ៣នាក់ដំបូង នៅទីតាំងខុនដូមួយកន្លែងក្នុងក្រុងព្រះសីហនុ ដោយដកហូតរថយន្ត១គ្រឿង និងទូរស័ព្ទដៃមួយចំនួនជាវត្ថុតាង។

បន្តការស្រាវជ្រាវយ៉ាងតឹងរ៉ឹង កម្លាំងអាវុធហត្ថបានរកឃើញទីតាំងថ្មីមួយនៅបុរីក្នុងសង្កាត់បិតត្រាំង ក្រុងកំពង់សោម ជាកន្លែងដែលជនរងគ្រោះត្រូវបានឃុំឃាំង និងបានចូលជួយសង្គ្រោះដោយជោគជ័យ ព្រមទាំងឃាត់ខ្លួនជនសង្ស័យបន្ថែម៣នាក់ទៀត។

សមត្ថកិច្ចបានដកហូតវត្ថុតាងរួមមាន រថយន្ត២គ្រឿង ទូរស័ព្ទដៃ៥គ្រឿង ឧបករណ៍សម្រាប់បិទភ្នែក និងសារធាតុសង្ស័យជាគ្រឿងញៀនមួយចំនួន។

តាមការស្រាវជ្រាវបឋម ជនរងគ្រោះត្រូវបានបោកបញ្ឆោតឱ្យធ្វើដំណើរពីប្រទេសម៉ាឡេស៊ីចូលមកកម្ពុជា ក្រោមលេសជួយរកការងារ។ ប៉ុន្តែពេលមកដល់ ត្រូវក្រុមជនល្មើសយកទៅឃុំឃាំង ជំរិតទារប្រាក់ និងបង្ខំឱ្យទាក់ទងបោកប្រាស់មនុស្សផ្សេងទៀត។ ប្រភពបញ្ជាក់ថា ក្រុមជនល្មើសបានជំរិតប្រាក់ពីជនរងគ្រោះអស់ជិត៣០ម៉ឺនយ័ន មុននឹងបន្តលក់ទៅឱ្យក្រុមផ្សេងទៀតក្នុងតម្លៃ៥ម៉ឺនដុល្លារ។

បច្ចុប្បន្ន ជនសង្ស័យទាំង៦នាក់ រួមជាមួយវត្ថុតាង ត្រូវបានកម្លាំងជំនាញកសាងសំណុំរឿង បញ្ជូនទៅតុលាការ ដើម្បីចាត់ការតាមនីតិវិធីច្បាប់ ខណៈជនរងគ្រោះកំពុងទទួលការការពារ និងសាកសួរបន្ថែមពីសមត្ថកិច្ច។

ករណីនេះបង្ហាញពីការប្តេជ្ញាចិត្តរបស់សមត្ថកិច្ចកម្ពុជា ក្នុងការបង្ក្រាបបទល្មើសឆ្លងដែន និងបណ្តាញជួញដូរមនុស្ស ដែលកំពុងបង្កគ្រោះថ្នាក់ដល់សន្តិសុខសង្គម និងសិទ្ធិមនុស្ស៕