លឿនដូចផ្លេកបន្ទោរ! នគរបាលក្រុងតាខ្មៅឃាត់ខ្លួនជនសង្ស័យបង្កហិង្សាលើម្ដាយ និងកូនតូចបានហើយ
(កណ្ដាល)៖ កម្លាំងនគរបាលក្រុងតាខ្មៅ បានចាត់វិធានការយ៉ាងឆាប់រហ័ស ដោយធ្វើការឃាត់ខ្លួនជនសង្ស័យម្នាក់ឈ្មោះ យ៉ា ខរីន ភេទប្រុស អាយុ៣៥ឆ្នាំ មុខរបរកម្មកររោងចក្រ ស្នាក់នៅបុរីគ្រីស្តាល់ ស្ថិតក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល ពាក់ព័ន្ធនឹងករណីប្រើអំពើហិង្សាលើស្ត្រី និងកូនតូច ដែលបានកើតឡើងកាលពីយប់ថ្ងៃទី៣ ខែឧសភា ឆ្នាំ២០២៦។
សូមបញ្ជាក់ថា ករណីហិង្សាដ៏គួរឱ្យភ្ញាក់ផ្អើលនេះ បានកើតឡើងនៅវេលាម៉ោងប្រមាណ៩៖៣០នាទីយប់ ក្នុងភូមិសាស្ត្រក្រុងតាខ្មៅ ខេត្តកណ្ដាល បណ្ដាលឱ្យស្ត្រីម្នាក់ និងកូនតូចរងរបួស ព្រមទាំងស្ថិតក្នុងស្ថានភាពភ័យខ្លាចយ៉ាងខ្លាំង បន្ទាប់ពីត្រូវជនសង្ស័យដេញវាយតាមដងផ្លូវ ចាប់ពីចំណុចមុខផ្ទះពេទ្យរស់ ក្បែរផ្សារកាច់ជ្រុង រហូតដល់ក្បែររបងវិទ្យាល័យតាខ្មៅ។
បើតាមការបញ្ជាក់ពីលោក វេង គឹមហួរ ដែលត្រូវជាស្វាមីរបស់ស្ត្រីរងគ្រោះឈ្មោះ កុយ រាសី បានប្រាប់បណ្ដាញព័ត៌មាន The Mirror News នៅព្រឹកថ្ងៃទី៤ ខែឧសភា ឆ្នាំ២០២៦ថា មុនពេលកើតហេតុ ភរិយារបស់លោកបាននាំកូនតូចទៅលេងផ្ទះអ្នកស្គាល់គ្នា នៅម្ដុំផ្សារកាច់ជ្រុង។ នៅទីនោះ ម្ចាស់ផ្ទះបានហៅជនសង្ស័យមកផឹកស៊ីជុំគ្នា ប៉ុន្តែក្រោយមកក៏ផ្ទុះទំនាស់ ឈានដល់ការប្រើអំពើហិង្សា។
ប្រភពដដែលបានបន្តថា បន្ទាប់ពីវាយប្រហារទៅលើស្ត្រីរងគ្រោះ និងកូនតូចបណ្ដាលឱ្យរងរបួសហើយ ជនសង្ស័យមិនបានបញ្ឈប់សកម្មភាពត្រឹមនោះទេ ប៉ុន្តែថែមទាំងបន្តដេញតាមវាយតាមផ្លូវសាធារណៈ។ មិនតែប៉ុណ្ណោះ ជនសង្ស័យត្រូវបានអះអាងថា បានប្រើកាំបិតប៉័ងតោព្យាយាមកាប់បំផ្លាញម៉ូតូ និងបង្កការគំរាមកំហែងដល់សុវត្ថិភាពកុមារដែលនៅជាមួយម្ដាយផងដែរ។
តាមប្រភពព័ត៌មានបានឱ្យដឹងថា ភាគីទាំងពីរជាមនុស្សស្គាល់គ្នា និងធ្លាប់បម្រើការងារនៅរោងចក្រជាមួយគ្នាពីមុន។ ក្រោយកើតហេតុ ស្ត្រីរងគ្រោះបានដាក់ពាក្យបណ្ដឹងជាផ្លូវការនៅអធិការដ្ឋាននគរបាលក្រុងតាខ្មៅ ដើម្បីស្នើសុំឱ្យសមត្ថកិច្ចចាត់វិធានការតាមផ្លូវច្បាប់។
បើតាមលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានឱ្យបណ្ដាញព័ត៌មាន The Mirror News ដឹងនៅថ្ងៃទី៤ ខែឧសភា ឆ្នាំ២០២៦ថា បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួនរួចហើយ និងកំពុងកសាងសំណុំរឿងបញ្ជូនបន្តតាមនីតិវិធីច្បាប់។
ករណីនេះបានទាក់ទាញការចាប់អារម្មណ៍ពីសាធារណជនយ៉ាងខ្លាំង ខណៈមហាជនបានសម្ដែងការកោតសរសើរចំពោះចំណាត់ការរហ័សរបស់កម្លាំងនគរបាលក្រុងតាខ្មៅ ក្នុងការបង្ក្រាប និងនាំខ្លួនជនសង្ស័យមកទទួលខុសត្រូវតាមផ្លូវច្បាប់៕
