រន្ធត់ណាស់! ម្ដាយនិងកូនតូចរត់គេចទាំងភ័យស្លន់ស្លោ ក្រោយបុរសម្នាក់តាមវាយនិងកាន់កាំបិតប៉័ងតោអារកង់ម៉ូតូដាច់ និងប្រុងកាប់លើកូនរបស់គាត់ នៅកណ្ដាលក្រុងតាខ្មៅ

(កណ្ដាល)៖ ករណីអំពើហិង្សាដ៏គួរឱ្យភ្ញាក់ផ្អើលមួយ បានកើតឡើងកាលពីវេលាម៉ោង ៩៖៣០ នាទីយប់ ថ្ងៃទី៣ ខែឧសភា ឆ្នាំ២០២៦ ស្ថិតក្នុងភូមិសាស្ត្រក្រុងតាខ្មៅ ខេត្តកណ្ដាល បង្កឱ្យស្ត្រីម្នាក់ និងកូនតូចរងរបួស ព្រមទាំងស្ថិតក្នុងស្ថានភាពភ័យខ្លាចយ៉ាងខ្លាំង ក្រោយរងការដេញវាយពីបុរសម្នាក់តាំងពីចំណុចមុខផ្ទះពេទ្យរស់ ក្បែរផ្សារកាច់ជ្រុង រហូតដល់ក្បែររបងវិទ្យាល័យតាខ្មៅ។

បើតាមការបញ្ជាក់ពីលោក វេង គឹមហួរ ដែលត្រូវជាស្វាមីរបស់ស្ត្រីរងគ្រោះឈ្មោះ កុយ រាសី បានប្រាប់បណ្ដាញព័ត៌មាន The Mirror News នៅព្រឹកថ្ងៃទី៤ ខែឧសភា ឆ្នាំ២០២៦ ថា មុនពេលកើតហេតុ ភរិយារបស់លោកបាននាំកូនតូចទៅលេងផ្ទះអ្នកស្គាល់គ្នា នៅម្ដុំផ្សារកាច់ជ្រុង មុខផ្ទះពេទ្យរស់។ នៅទីនោះ ម្ចាស់ផ្ទះបានហៅជនសង្ស័យមកផឹកស៊ីជុំគ្នា ប៉ុន្តែក្រោយមក ស្រាប់តែកើតមានទំនាស់ រហូតឈានដល់ការប្រើអំពើហិង្សា ដោយជនសង្ស័យបានវាយទៅលើស្ត្រីរងគ្រោះ និងកូនតូច បណ្ដាលឱ្យរងរបួស។

ប្រភពដដែលបានបន្តថា ក្រោយធ្វើសកម្មភាពវាយប្រហារ ជនសង្ស័យមិនបានបញ្ឈប់ត្រឹមនោះទេ ប៉ុន្តែថែមទាំងដេញតាមវាយជនរងគ្រោះតាមដងផ្លូវ ចាប់ពីចំណុចផ្សារកាច់ជ្រុង រហូតដល់ក្បែររបងវិទ្យាល័យ ហ៊ុន សែន តាខ្មៅ។ អ្វីដែលកាន់តែធ្វើឱ្យមហាជនភ្ញាក់ផ្អើលនោះ គឺជនសង្ស័យត្រូវបានអះអាងថា បានយកកាំបិតប៉័ងតោមកព្យាយាមកាប់បំផ្លាញម៉ូតូ និងប៉ុនប៉ងធ្វើសកម្មភាពបង្កគ្រោះថ្នាក់លើកុមារដែលនៅជាមួយម្ដាយផងដែរ។

តាមប្រភពព័ត៌មាន ស្ត្រីរងគ្រោះបច្ចុប្បន្នស្នាក់នៅផ្ទះជួលក្បែររបងវិទ្យាល័យ ហ៊ុន សែន តាខ្មៅ ខណៈជនសង្ស័យឈ្មោះ រីម ជាកម្មកររោងចក្រ ស្នាក់នៅក្នុងបុរីគ្រីស្ទាល ស្ថិតក្នុងភូមិព្រែកសំរោង១ សង្កាត់តាខ្មៅ ក្រុងតាខ្មៅ ខេត្តកណ្ដាល។ ប្រភពដដែលបញ្ជាក់ថា ភាគីទាំងពីរជាមនុស្សស្គាល់គ្នា និងធ្លាប់ធ្វើការនៅរោងចក្រជាមួយគ្នាពីមុន។

បច្ចុប្បន្ន ស្ត្រីរងគ្រោះបានដាក់ពាក្យបណ្ដឹងជាផ្លូវការនៅអធិការដ្ឋាននគរបាលក្រុងតាខ្មៅរួចហើយ ដើម្បីស្នើសុំឱ្យសមត្ថកិច្ចចាត់វិធានការតាមផ្លូវច្បាប់។ ខណៈមហាជនកំពុងរង់ចាំលទ្ធផលស្រាវជ្រាវ និងចំណាត់ការផ្លូវច្បាប់ចំពោះជនសង្ស័យ៕