គាស់បន្ទប់លួចម៉ូតូ មិនរួចខ្លួន! នគរបាលស្វាយរៀងក្របួចជនសង្ស័យ២នាក់ បញ្ជូនទៅតុលាការ

(ស្វាយរៀង)៖ កម្លាំងនគរបាលនៃស្នងការដ្ឋាននគរបាលខេត្តស្វាយរៀង បានបង្ហាញប្រសិទ្ធភាពក្នុងការស្រាវជ្រាវ និងបង្ក្រាបបទល្មើស ដោយឃាត់ខ្លួនជនសង្ស័យចំនួន ២នាក់ ពាក់ព័ន្ធករណីគាស់បន្ទប់លួចយកម៉ូតូ និងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់។

ប្រតិបត្តិការនេះ បានធ្វើឡើងបន្ទាប់ពីនៅវេលាម៉ោង ៥:៤០នាទីល្ងាច ថ្ងៃទី២៨ ខែមេសា ឆ្នាំ២០២៦ សមត្ថកិច្ចបានទទួលព័ត៌មានពីប្រជាពលរដ្ឋថា មានករណីគាស់បន្ទប់លួចម៉ូតូមួយកើតឡើងនៅចំណុចភូមិអង្គ្រង ឃុំស្វាយរំពារ ស្រុកស្វាយទាប ខេត្តស្វាយរៀង។

ក្រោយទទួលបានព័ត៌មាន និងពាក្យបណ្ដឹងពីជនរងគ្រោះភ្លាមៗ ដោយអនុវត្តតាមបទបញ្ជារបស់ថ្នាក់ដឹកនាំនគរបាលជាតិ និងការដឹកនាំផ្ទាល់ពីលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង កម្លាំងអធិការដ្ឋាននគរបាលស្រុកស្វាយទាប បានចុះពិនិត្យទីតាំងកើតហេតុ និងបើកការស្រាវជ្រាវយ៉ាងសកម្ម។

តាមការស្រាវជ្រាវ សមត្ថកិច្ចបានកំណត់មុខសញ្ញា និងដេញតាមជនសង្ស័យដែលជិះម៉ូតូគេចខ្លួនឆ្ពោះទៅទិសដៅស្រុកចន្ទ្រា។ រហូតដល់វេលាម៉ោង ១០:០៥នាទីយប់ ថ្ងៃដដែល នៅគោលដៅត្រួតពិនិត្យអាវុធជាតិផ្ទុះ និងបង្ការ បង្ក្រាបបទល្មើសគ្រប់ប្រភេទ របស់អធិការដ្ឋាននគរបាលស្រុកចន្ទ្រា កម្លាំងសមត្ថកិច្ចបានឃាត់ខ្លួនជនសង្ស័យទាំង ២នាក់បានដោយជោគជ័យ។

ការស៊ើបអង្កេតបឋមបង្ហាញថា ជនសង្ស័យទាំងពីរជាមុខសញ្ញាធ្លាប់មានប្រវត្តិជាប់ពន្ធនាគារ ហើយពាក់ព័ន្ធនឹងសកម្មភាពជួញដូរគ្រឿងញៀនផងដែរ។ នៅចំពោះមុខសមត្ថកិច្ច ពួកគេបានសារភាពថា ពិតជាបានធ្វើសកម្មភាពគាស់បន្ទប់លួចយកម៉ូតូដូចការចោទប្រកាន់ពិតប្រាកដមែន។

បច្ចុប្បន្ន ជនសង្ស័យទាំងពីរ ត្រូវបានកម្លាំងជំនាញកសាងសំណុំរឿង បញ្ជូនទៅសាលាដំបូងខេត្តស្វាយរៀង ដើម្បីចាត់ការតាមផ្លូវច្បាប់ ខណៈវត្ថុតាងដែលដកហូតបាន កំពុងបន្តនីតិវិធីប្រគល់ជូនម្ចាស់ដើមវិញ។

ជាមួយគ្នានេះ សមត្ថកិច្ចក៏បានថ្លែងអំណរគុណដល់ប្រជាពលរដ្ឋ និងអ្នកសារព័ត៌មាន ដែលបានចូលរួមសហការផ្តល់ព័ត៌មានបានទាន់ពេលវេលា ដែលជាចំណែកសំខាន់ជួយឱ្យការបង្ក្រាបបទល្មើសទទួលបានលទ្ធផលល្អ និងមានប្រសិទ្ធភាព៕