ស្នងការខេត្តព្រៃវែងដឹកនាំប្រតិភូចូលរួមកិច្ចប្រជុំពង្រឹងកិច្ចសហប្រតិបត្តិការសន្តិសុខតំបន់ព្រំដែន កម្ពុជា-វៀតណាម!

(ព្រៃវែង)៖ លោកឧត្តមសេនីយ៍ទោ ឈឿន ប៊ុនឆន ស្នងការនៃស្នងការដ្ឋាននគរបាលខេត្តព្រៃវែង នៅថ្ងៃទី២៨ ខែមេសា ឆ្នាំ២០២៦ បានដឹកនាំគណៈប្រតិភូចូលរួមកិច្ចប្រជុំស្តីពី កិច្ចសហប្រតិបត្តិការធានាសន្តិសុខ និងសណ្ដាប់ធ្នាប់នៅតំបន់ព្រំដែន រវាងស្នងការដ្ឋាននគរបាលខេត្តព្រៃវែង នៃព្រះរាជាណាចក្រកម្ពុជា និងមន្ទីរនគរបាលខេត្តដុងថាប់ នៃសាធារណរដ្ឋសង្គមនិយមវៀតណាម។

កិច្ចប្រជុំនេះធ្វើឡើងក្នុងគោលបំណងពង្រឹងបន្ថែមលើទំនាក់ទំនងសហប្រតិបត្តិការ និងការសម្របសម្រួលការងាររវាងភាគីទាំងពីរ ដើម្បីធានាបាននូវសន្តិសុខ សណ្ដាប់ធ្នាប់ និងសុវត្ថិភាពនៅតាមបណ្តោយព្រំដែនរួម ជាពិសេសក្នុងការបង្ការ និងទប់ស្កាត់បទល្មើសឆ្លងដែនគ្រប់ប្រភេទ។

ក្នុងឱកាសនោះ លោកឧត្តមសេនីយ៍ទោ ឈឿន ប៊ុនឆន និងសហការី ក៏បានជួបសួរសុខទុក្ខលោកនាយកមន្ទីរនគរបាលខេត្តដុងថាប់ ព្រមទាំងមន្ត្រីក្រោមឱវាទ ដោយបានផ្លាស់ប្តូរកាដូអនុស្សាវរីយ៍ទៅវិញទៅមក ក្នុងបរិយាកាសស្និទ្ធស្នាល និងមិត្តភាពយ៉ាងជិតស្និទ្ធ។

ថ្នាក់ដឹកនាំនគរបាលនៃខេត្តទាំងពីរ បានវាយតម្លៃខ្ពស់ចំពោះកិច្ចសហប្រតិបត្តិការនាពេលកន្លងមក ដែលបានរួមចំណែកយ៉ាងសំខាន់ក្នុងការការពារ សន្តិសុខ សណ្ដាប់ធ្នាប់ និងដោះស្រាយឧបទ្ទវហេតុនានានៅតំបន់ព្រំដែន ប្រកបដោយប្រសិទ្ធភាព និងទាន់ពេលវេលា។

ជាមួយគ្នានេះ ភាគីទាំងពីរបានប្តេជ្ញាបន្តពង្រឹងកិច្ចសហប្រតិបត្តិការឱ្យកាន់តែរឹងមាំ ដើម្បីថែរក្សាសន្តិភាព ស្ថិរភាព និងជំរុញការអភិវឌ្ឍនៅតំបន់ព្រំដែនឱ្យកាន់តែមានភាពរីកចម្រើន។

គួរបញ្ជាក់ថា ខេត្តព្រៃវែង និងខេត្តដុងថាប់ ជាខេត្តមានព្រំប្រទល់ជាប់គ្នា និងមានប្រវត្តិសហប្រតិបត្តិការល្អប្រសើរជាយូរមកហើយ ដែលបានកសាងចំណងមិត្តភាព សាមគ្គីភាព និងការគាំទ្រគ្នាទៅវិញទៅមក សំដៅលើការរក្សាសន្តិសុខ និងការអភិវឌ្ឍរួមប្រកបដោយចីរភាព៕