ភ្ញាក់ផ្អើលទាំងយប់នៅស្អាង! ជនសង្ស័យលួចចូលផ្ទះ ព្រមទាំងគំរាមសម្លាប់ម្ចាស់ផ្ទះ ត្រូវសមត្ថកិច្ចឃាត់ខ្លួន

(កណ្ដាល)៖ ជនសង្ស័យម្នាក់ ពាក់ព័ន្ធករណីរំលោភលើលំនៅឋាន ប្រើប្រាស់សារធាតុញៀន និងគំរាមសម្លាប់ម្ចាស់ផ្ទះ ត្រូវបានកម្លាំងនគរបាលស្រុកស្អាង ធ្វើការឃាត់ខ្លួនបាន ក្រោយបង្កការភ្ញាក់ផ្អើលដល់ប្រជាពលរដ្ឋទាំងកណ្ដាលអធ្រាត។

ហេតុការណ៍នេះបានកើតឡើងនៅវេលាម៉ោង១០:២០នាទីយប់ ថ្ងៃទី២៤ ខែមេសា ឆ្នាំ២០២៦ នៅចំណុចភូមិទួលសូភី ឃុំព្រែកគយ ស្រុកស្អាង ខេត្តកណ្ដាល ខណៈជនសង្ស័យត្រូវបានឃាត់ខ្លួននៅវេលាម៉ោង ០០:២០នាទី រំលងអាធ្រាតឈានចូលថ្ងៃទី២៥ ខែមេសា ឆ្នាំ២០២៦។

តាមសមត្ថកិច្ចបានឲ្យដឹងថា ជនរងគ្រោះជាស្ត្រីវ័យ ៤៣ឆ្នាំ មុខរបរកសិករ រស់នៅទីតាំងកើតហេតុ។ ចំណែកជនសង្ស័យឈ្មោះ ភាង សុខខុម ភេទប្រុស អាយុ ៤៣ឆ្នាំ មុខរបរមិនពិតប្រាកដ និងតេស្តឃើញមានសារធាតុញៀន។

ប្រភពដដែលបញ្ជាក់ថា មុនកើតហេតុ ជនរងគ្រោះបានភ្ញាក់ពីដំណេក ហើយប្រទះឃើញជនសង្ស័យចូលក្នុងផ្ទះ និងឈរនៅក្បែរគ្រែដេកកូន។ ពេលស្រែកឆោឡោ ជនសង្ស័យបានរត់គេចខ្លួន ប៉ុន្តែមិនភ្លេចស្រែកគំរាមសម្លាប់ម្ចាស់ផ្ទះ និងក្រុមគ្រួសារ។
មិនយូរប៉ុន្មាន ជនសង្ស័យបានត្រឡប់មកវិញម្ដងទៀត ដោយកាន់ដែកបម្រុងចូលក្នុងផ្ទះ តែត្រូវម្ចាស់ផ្ទះឃើញទាន់ និងស្រែកហៅអ្នកជិតខាងជួយអន្តរាគមន៍ រហូតប្រជាពលរដ្ឋសហការឃាត់ខ្លួនបាន និងប្រគល់ជូនសមត្ថកិច្ច។

បច្ចុប្បន្ន ជនសង្ស័យត្រូវបានឃាត់ខ្លួនជាបណ្ដោះអាសន្ននៅអធិការដ្ឋាននគរបាលស្រុកស្អាង ដើម្បីកសាងសំណុំរឿង និងចាត់ការតាមនីតិវិធីច្បាប់៕