ស្នងការខេត្តព្រៃវែងព្រមានក្រុមក្មេងទំនើង បញ្ជាក់ការអនុវត្តច្បាប់នឹងរឹតបន្តឹងជាងមុន

(ព្រៃវែង)៖ លោកស្នងការ ឈឿន ប៊ុនឆន បានលើកឡើងតាមបណ្ដាញសង្គមហ្វេសប៊ុកនៅព្រឹកថ្ងៃទី២៦ ខែមេសានេះ ដោយយកបទពិសោធន៍ពីប្រតិបត្តិការនៅខេត្តកំពង់ចាម និងខេត្តកំពង់ស្ពឺ មកធ្វើជាមេរៀនសម្រាប់មន្ត្រីនគរបាលទូទាំងខេត្តព្រៃវែង ក្នុងការបង្កើនការប្រុងប្រយ័ត្ន និងភាពម៉ឺងម៉ាត់ខ្ពស់ជាងមុន ពេលចុះអនុវត្តច្បាប់ និងរក្សាសណ្ដាប់ធ្នាប់សាធារណៈ។

ជាមួយគ្នានេះ លោកស្នងការក៏បានផ្ញើសារព្រមានទៅកាន់ក្រុមក្មេងទំនើង និងជនបង្កអសន្តិសុខសង្គមដែលនៅសេសសល់ក្នុងមូលដ្ឋានថា ប្រសិនបើនៅតែបន្តសកម្មភាពបង្កបទល្មើស បង្កអសន្តិសុខ និងប៉ះពាល់ដល់សណ្ដាប់ធ្នាប់សាធារណៈ កម្លាំងសមត្ថកិច្ចនឹងចាត់វិធានការបង្ក្រាបយ៉ាងតឹងរ៉ឹង និងម៉ឺងម៉ាត់ជាងមុន។

ការលើកឡើងនេះ ត្រូវបានគេមើលឃើញថា ជាសារបង្ហាញពីការប្ដេជ្ញាចិត្តរបស់ស្នងការដ្ឋាននគរបាលខេត្តព្រៃវែង ក្នុងការពង្រឹងសន្តិសុខសង្គម និងទប់ស្កាត់រាល់សកម្មភាពល្មើសច្បាប់ ដើម្បីធានាសុវត្ថិភាពជូនប្រជាពលរដ្ឋ៕