កម្ពុជាតវ៉ាផ្លូវការទៅ WSJ ជុំវិញពាក្យ «Scambodia» ចាត់ទុកថាប៉ះពាល់កិត្តិយសជាតិ

(ភ្នំពេញ)៖ ក្រសួងព័ត៌មានកម្ពុជា បានផ្ញើលិខិតតវ៉ាជាផ្លូវការទៅកាន់កាសែត The Wall Street Journal បន្ទាប់ពីសារព័ត៌មានអន្តរជាតិនេះ ចុះផ្សាយអត្ថបទមួយប្រើពាក្យ «Scambodia» ដែលភាគីកម្ពុជាចាត់ទុកថា ជាពាក្យបង្អាប់ និងប៉ះពាល់ដល់កិត្តិយស កេរ្តិ៍ឈ្មោះ និងអធិបតេយ្យភាពរបស់ប្រទេស។

អ្នកនាំពាក្យក្រសួងព័ត៌មាន លោក ទេព អស្នារិទ្ធ បានឱ្យដឹងថា នៅថ្ងៃទី២៤ ខែមេសា ឆ្នាំ២០២៦ កាសែត WSJ បានចុះផ្សាយអត្ថបទទស្សនៈ (Opinion Piece) ដោយដកស្រង់ខ្លឹមសារពីលិខិតរបស់លោក នេត្រ ភក្ត្រា រដ្ឋមន្ត្រីក្រសួងព័ត៌មាន ដែលបានផ្ញើទៅកាន់និពន្ធនាយក និងអ្នកគ្រប់គ្រងការផ្សាយរបស់សារព័ត៌មាននេះ ប៉ុន្មានម៉ោងក្រោយការចុះផ្សាយអត្ថបទដើម។

ក្នុងលិខិតតវ៉ា លោករដ្ឋមន្ត្រីបានបញ្ជាក់ថា ទោះបីពាក្យនោះត្រូវបានដាក់ក្នុងសញ្ញាអញ្ញត្តិ និងមានការពន្យល់បន្ថែមក៏ដោយ ក៏វានៅតែអាចបង្កការយល់ច្រឡំ និងប៉ះពាល់ដល់រូបភាពជាតិទាំងមូល។ ក្រសួងព័ត៌មានយល់ថា សារព័ត៌មានអន្តរជាតិគួរតែប្រកាន់ខ្ជាប់នូវវិជ្ជាជីវៈ និងជៀសវាងការប្រើប្រាស់ភាសាដែលមានចរិតអគតិ ឬបង្កការរើសអើង។

តាមការបញ្ជាក់របស់ក្រសួង អត្ថបទទស្សនៈដែល WSJ ចុះផ្សាយក្រោយមក ត្រូវបានចាត់ទុកថាជាការបើកផ្លូវឱ្យសាធារណជនអន្តរជាតិបានយល់អំពីជំហរ និងកិច្ចខិតខំរបស់កម្ពុជា ក្នុងការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា។ ទោះជាយ៉ាងណា ក្រសួងព័ត៌មាននៅតែរក្សាជំហរដាច់ខាត ទាមទារឱ្យ WSJ ដកពាក្យនោះចេញពីអត្ថបទដើម។

ក្រសួងព័ត៌មានបានបញ្ជាក់ថា ការយកឈ្មោះប្រទេសដែលមានអធិបតេយ្យភាពទៅប្រើប្រាស់ក្នុងចំណងជើងដែលមានន័យបង្អាប់ គឺជាបញ្ហាក្រមសីលធម៌សារព័ត៌មាន និងអាចបង្កផលប៉ះពាល់ដល់ទំនុកចិត្តសាធារណៈលើប្រទេសមួយទាំងមូល។

ជាមួយគ្នានេះ ក្រសួងព័ត៌មានអះអាងថា នឹងបន្តតាមដានករណីនេះយ៉ាងជិតស្និទ្ធ ដើម្បីការពារកិត្តិយស និងសេចក្តីថ្លៃថ្នូររបស់កម្ពុជា ខណៈកម្ពុជាកំពុងបន្តពង្រឹងវិធានការបង្ក្រាបឧក្រិដ្ឋកម្មឆ្លងដែន និងបទល្មើសឆបោកតាមប្រព័ន្ធអនឡាញ៕