បង្ក្រាបទីតាំងឆបោកអនឡាញក្នុងខុនដូកណ្ដាលភ្នំពេញ ឃាត់ខ្លួនជនបរទេស៤០នាក់ និងដកហូតវត្ថុតាងជាច្រើន

(ភ្នំពេញ)៖ កម្លាំងនគរបាលរាជធានីភ្នំពេញ បានបើកប្រតិបត្តិការចុះបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) នៅទីតាំងខុនដូ ប៉ោលី (BAOLI INTER CITY) ស្ថិតក្នុងភូមិ៣ សង្កាត់វាលវង់ ខណ្ឌ៧មករា កាលពីយប់ថ្ងៃទី២៤ ខែមេសា ឆ្នាំ២០២៦ ដោយឃាត់ខ្លួនជនបរទេសសរុប ៤០នាក់ និងដកហូតបានសម្ភារៈអេឡិចត្រូនិកជាច្រើនសម្រាប់បម្រើសកម្មភាពល្មើស។

ប្រតិបត្តិការនេះ ធ្វើឡើងក្រោមការដឹកនាំបញ្ជាផ្ទាល់ពីថ្នាក់ដឹកនាំរាជធានីភ្នំពេញ និងស្នងការដ្ឋាននគរបាលរាជធានីភ្នំពេញ ដោយមានការសម្របសម្រួលនីតិវិធីពីតំណាងអយ្យការ និងការចូលរួមពីក្រុមការងារចម្រុះពាក់ព័ន្ធ។

យោងតាមរបាយការណ៍សមត្ថកិច្ច ជនសង្ស័យដែលត្រូវបានឃាត់ខ្លួន មានជាប់ពាក់ព័ន្ធនឹងការបោកប្រាស់អនឡាញក្រោមរូបភាពអូសទាញឱ្យជនរងគ្រោះវិនិយោគ ការប្រើប្រាស់គណនីក្លែងក្លាយ និងការបង្កើតវេបសាយបោកប្រាស់។ ក្នុងនោះ មានជនជាតិចិន រុស្ស៊ី និងបង់ក្លាដេស ព្រមទាំងជនបរទេសមួយចំនួនទៀតដែលគ្មានឯកសារស្នាក់នៅត្រឹមត្រូវ។

សមត្ថកិច្ចបានដកហូតទូរស័ព្ទដៃជាង ៥៣០គ្រឿង កុំព្យូទ័រលើតុ កុំព្យូទ័រយួរដៃ និងឧបករណ៍អេឡិចត្រូនិកជាច្រើន ដែលត្រូវបានសង្ស័យថាប្រើប្រាស់សម្រាប់ប្រព្រឹត្តបទល្មើសបច្ចេកវិទ្យា។
បច្ចុប្បន្ន ជនសង្ស័យ និងវត្ថុតាងទាំងអស់ ត្រូវបានសមត្ថកិច្ចជំនាញកសាងសំណុំរឿង និងបន្តនីតិវិធីច្បាប់ ដើម្បីស្រាវជ្រាវរកបណ្ដាញពាក់ព័ន្ធ និងជនរងគ្រោះបន្ថែម៕