ចិនជិះរថយន្តទំនើប លួចស្លាកលេខរថយន្តក្នុងមន្ទីរពេទ្យ ត្រូវសមត្ថកិច្ចក្របួចជាប់ ដកហូតថ្នាំញៀន និងគ្រាប់កាំភ្លើង

(កណ្ដាល)៖ ជនសង្ស័យជាជនជាតិចិន២នាក់ ដែលបើករថយន្តទំនើបចូលធ្វើសកម្មភាពលួចដោះស្លាកលេខរថយន្តរបស់គ្រូពេទ្យ និងប្រជាពលរដ្ឋនៅក្នុងបរិវេណមន្ទីរពេទ្យតេជោសែនកោះធំ ត្រូវបានកម្លាំងនគរបាលស្រុកកោះធំ សហការជាមួយកម្លាំងជំនាញខេត្ត និងនគរបាលក្រុងសំពៅពូន ស្រាវជ្រាវឃាត់ខ្លួនបានជោគជ័យ។

ប្រតិបត្តិការឃាត់ខ្លួនធ្វើឡើងនៅយប់ថ្ងៃទី២៣ ខែមេសា ឆ្នាំ២០២៦ ក្រោយជនសង្ស័យបានធ្វើសកម្មភាពលួចនៅវេលាទាបភ្លឺថ្ងៃដដែល។ ក្នុងនោះ សមត្ថកិច្ចដកហូតបានរថយន្ត Ford Ranger ១គ្រឿង ស្លាកលេខរថយន្តចំនួន១០សន្លឹក ទូរស័ព្ទដៃ២គ្រឿង គ្រាប់កាំភ្លើងខ្លី១២គ្រាប់ និងម្សៅសង្ស័យជាគ្រឿងញៀន១កញ្ចប់តូច រួមទាំងសម្ភារៈមួយចំនួនទៀត។

តាមការបញ្ជាក់ពីសមត្ថកិច្ច ជនសង្ស័យទាំង២មានសារធាតុញៀនក្នុងទឹកនោមវិជ្ជមាន ខណៈបក្ខពួក២នាក់ទៀតបានរត់គេចខ្លួន និងកំពុងត្រូវស្រាវជ្រាវតាមចាប់ខ្លួន។

បច្ចុប្បន្ន ជនសង្ស័យ និងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕