នគរបាលស័ក្ដិ៥រងវិវាទត្រូវបង្គាប់ចូលបំភ្លឺ ខណៈក្រសួងមហាផ្ទៃបើកការស្រាវជ្រាវ

(ភ្នំពេញ)៖ ក្រសួងមហាផ្ទៃ បានបង្គាប់ឲ្យមន្ត្រីនគរបាលពាក់ស័ក្ដិ៥ ឈ្មោះ ខៀវ សុងច័ន្ទសុធា ចូលខ្លួនបំភ្លឺ និងធ្វើរបាយការណ៍នៅអង្គភាពពាក់ព័ន្ធ បន្ទាប់ពីរងការរិះគន់យ៉ាងខ្លាំងពីមហាជនក្នុងហេតុការណ៍គ្រោះថ្នាក់ចរាចរណ៍ និងការប្រើពាក្យសម្ដីមិនសមរម្យលើពលរដ្ឋ។ ទន្ទឹមនឹងនេះ អគ្គាធិការដ្ឋានក្រសួងមហាផ្ទៃ ក៏កំពុងចូលរួមពិនិត្យ និងអនុវត្តនីតិវិធីផងដែរ។

អ្នកនាំពាក្យរងក្រសួងមហាផ្ទៃ បានបញ្ជាក់ថា ករណីនេះកំពុងត្រូវបានតាមដានយ៉ាងម៉ត់ចត់ ដើម្បីវាយតម្លៃតាមច្បាប់ និងវិន័យរដ្ឋបាល។ ហេតុការណ៍កើតឡើងក្រោយមានការប៉ះទង្គិចរវាងរថយន្តពីរគ្រឿង លើផ្លូវជាតិលេខ១ ខណ្ឌច្បារអំពៅ ខណៈភាគីម្ខាងត្រូវបានរាយការណ៍ថាស្ថិតក្នុងស្ថានភាពស្រវឹង ប៉ុន្តែមិនបានគេចវេស និងព្យាយាមដោះស្រាយសំណងតាមសមរម្យ។

យ៉ាងណាក៏ដោយ សកម្មភាពប្រើសម្ដីគំរាម និងឥរិយាបថមិនសមរម្យរបស់មន្ត្រីនគរបាលរូបនេះ បានបង្កការរិះគន់ពីសង្គមយ៉ាងខ្លាំង និងលើកឡើងពីសំណួរអំពីវិន័យ ក្រមសីលធម៌ និងការប្រើអំណាចក្នុងតួនាទីសាធារណៈ។ មហាជនក៏ទាមទារឲ្យមានការស្រាវជ្រាវដោយតម្លាភាព និងអនុវត្តវិធានការតាមច្បាប់ ដើម្បីថែរក្សាកិត្តិយស និងទំនុកចិត្តលើស្ថាប័ន៕