ស្នងការនគរបាលខេត្តកណ្ដាលដឹកនាំកិច្ចប្រជុំបូកសរុបលទ្ធផលខែមេសា និងដាក់ចេញទិសដៅអនុវត្តការងារខែឧសភា ឆ្នាំ២០២៦

(កណ្ដាល)៖ នៅព្រឹកថ្ងៃសុក្រ ទី២៤ ខែមេសា ឆ្នាំ២០២៦ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានអញ្ជើញជាអធិបតី ដឹកនាំកិច្ចប្រជុំបូកសរុបលទ្ធផលការងារប្រចាំខែមេសា និងលើកទិសដៅការងារសម្រាប់ខែឧសភា ឆ្នាំ២០២៦ នៅសាលប្រជុំស្នងការដ្ឋាននគរបាលខេត្តកណ្ដាល។

កិច្ចប្រជុំនេះ ត្រូវបានរៀបចំឡើងដោយអនុវត្តតាមការដឹកនាំបញ្ជាដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ ដោយមានការចូលរួមពីសំណាក់ថ្នាក់ដឹកនាំ និងមន្ត្រីពាក់ព័ន្ធជាច្រើនរូប រួមមាន លោក-លោកស្រីស្នងការរង លោក-លោកស្រីនាយការិយាល័យ លោកអធិការនគរបាលគ្រប់ស្រុក/ក្រុង លោកមេបញ្ជាការវរៈសេនាតូចនគរបាលការពារព្រំដែនគោកលេខ៦០៥ លោកប្រធានប៉ុស្តិ៍នគរបាលច្រកទ្វារអន្តរជាតិជ្រៃធំ និងលោកនាយប៉ុស្តិ៍នគរបាលរដ្ឋបាលទាំង១២៧។

ក្នុងកិច្ចប្រជុំ លោកស្នងការបានធ្វើការវាយតម្លៃលទ្ធផលការងារដែលអង្គភាពនានាបានអនុវត្តក្នុងខែមេសា កន្លងមក ដោយបានបង្ហាញពីសមិទ្ធផលសំខាន់ៗ ក៏ដូចជាបញ្ហាប្រឈម និងកង្វះខាតដែលត្រូវកែលម្អ។ ព្រមទាំងបានដាក់ចេញនូវទិសដៅការងារសម្រាប់ខែបន្ទាប់ ដើម្បីបន្តពង្រឹងសន្តិសុខ សណ្តាប់ធ្នាប់សាធារណៈ និងបង្កើនប្រសិទ្ធភាពនៃការអនុវត្តច្បាប់នៅទូទាំងភូមិសាស្ត្រខេត្ត។

លោកឧត្តមសេនីយ៍ទោ ឈឿន សុចិត្ត ក៏បានណែនាំដល់អង្គភាពជំនាញ និងមន្ត្រីក្រោមឱវាទទាំងអស់ ត្រូវបន្តអនុវត្តភារកិច្ចដោយមានវិន័យខ្ពស់ ការទទួលខុសត្រូវ និងស្មារតីបម្រើប្រជាពលរដ្ឋ ឲ្យកាន់តែមានប្រសិទ្ធភាព ដើម្បីឆ្លើយតបទៅនឹងស្ថានភាពសន្តិសុខសង្គមដែលកំពុងផ្លាស់ប្តូរ។

កិច្ចប្រជុំបានបញ្ចប់ដោយបរិយាកាសយ៉ាងសកម្ម និងការប្តេជ្ញាចិត្តខ្ពស់ពីសំណាក់មន្ត្រីទាំងអស់ ក្នុងការអនុវត្តតាមទិសដៅដែលបានដាក់ចេញ ដើម្បីធានាសុវត្ថិភាព និងសុខសន្តិភាពជូនប្រជាពលរដ្ឋ៕