នាយករដ្ឋមន្ត្រី ចេញអនុក្រឹត្យផ្ទេរ និងតែងតាំងអភិបាលក្រុង-ស្រុក៥ នៅខេត្តតាកែវ

(តាកែវ)៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានចេញអនុក្រឹត្យសម្រេចផ្ទេរមុខតំណែង និងតែងតាំងមុខតំណែងអភិបាលក្រុង-ស្រុកចំនួន៥ នៅខេត្តតាកែវ ក្នុងគោលបំណងពង្រឹងប្រសិទ្ធភាពការងាររដ្ឋបាលមូលដ្ឋាន និងលើកកម្ពស់ការផ្តល់សេវាសាធារណៈជូនប្រជាពលរដ្ឋ។

តាមអនុក្រឹត្យ ដែលបណ្តាញព័ត៌មាន The Mirror News ទទួលបាននៅថ្ងៃទី២៤ ខែមេសា ឆ្នាំ២០២៦នេះ បានសម្រេចដូចតទៅ៖
*១. ផ្ទេរមុខតំណែងលោក កង អាណាន់ ពីអភិបាលក្រុងដូនកែវ ទៅជាអភិបាលស្រុកអង្គរបូរី។
*២. ផ្ទេរមុខតំណែងលោក ឌឹម គឹមសាន ពីអភិបាលស្រុកព្រៃកប្បាស ទៅជាអភិបាលក្រុងដូនកែវ។
*៣. ផ្ទេរមុខតំណែងលោក គិន ភក្តី ពីអភិបាលស្រុកកោះអណ្តែត ទៅជាអភិបាលស្រុកព្រៃកប្បាស។
*៤. ផ្ទេរមុខតំណែងលោក ភួន ឈីម ពីអភិបាលស្រុកបាទី ទៅជាអភិបាលស្រុកកោះអណ្តែត។
*៥. តែងតាំងលោក សាយ វណ្ណៈ អតីតអភិបាលរងស្រុកត្រាំកក់ ទៅជាអភិបាលស្រុកបាទី។

ការផ្លាស់ប្តូរមុខតំណែងនេះ ត្រូវបានមើលឃើញថាជាផ្នែកមួយនៃយុទ្ធសាស្ត្ររដ្ឋាភិបាល ក្នុងការរៀបចំ និងបង្កើនប្រសិទ្ធភាពដឹកនាំគ្រប់គ្រងរដ្ឋបាលមូលដ្ឋាន ឲ្យមានភាពប្រសើរឡើង សមស្របទៅនឹងតម្រូវការអភិវឌ្ឍន៍ជាក់ស្តែងនៅតាមតំបន់នីមួយៗ។

យោងតាមការរៀបចំ ការប្រកាសចូលកាន់មុខតំណែងរបស់អភិបាលក្រុង-ស្រុកទាំង៥ នឹងត្រូវប្រារព្ធធ្វើឡើងជាបន្តបន្ទាប់ នៅដើមសប្តាហ៍ក្រោយនេះ ដោយមានការចូលរួមពីមន្ត្រីពាក់ព័ន្ធ

និងអាជ្ញាធរមូលដ្ឋាន៕