ជប៉ុនផ្ដល់ឥណទានជិត ៥០លានដុល្លារ ពង្រឹងប្រព័ន្ធការពារទឹកជំនន់ និងបង្ហូរទឹកនៅភ្នំពេញ

(ភ្នំពេញ)៖ រាជរដ្ឋាភិបាលកម្ពុជា ទទួលបានការគាំទ្រថ្មីពីរដ្ឋាភិបាលជប៉ុន ក្នុងទម្រង់ឥណទានហិរញ្ញប្បទានប្រមាណជិត ៥០លានដុល្លារ សម្រាប់អនុវត្តគម្រោងពង្រឹងប្រព័ន្ធការពារទឹកជំនន់ និងកែលម្អប្រព័ន្ធបង្ហូរទឹកនៅរាជធានីភ្នំពេញ។

ពិធីចុះហត្ថលេខាលើលិខិតប្តូរសារ និងឯកសារពាក់ព័ន្ធ បានប្រព្រឹត្តទៅនៅរសៀលថ្ងៃទី២៣ ខែមេសា ឆ្នាំ២០២៦ នៅទីស្តីការក្រសួងការបរទេស និងសហប្រតិបត្តិការអន្តរជាតិ ក្រោមអធិបតីភាព ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តម UENO Atsushi ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំកម្ពុជា។

តាមឯកសារផ្លូវការ ឥណទាននេះមានទឹកប្រាក់ចំនួន ៦,៩០៨,០០០,០០០ យ៉េន ស្មើប្រមាណ ៤៦លានដុល្លារអាម៉េរិក ដែលជាផ្នែកមួយនៃការគាំទ្ររយៈពេលវែងរបស់ជប៉ុន ដល់ការអភិវឌ្ឍហេដ្ឋារចនាសម្ព័ន្ធនៅកម្ពុជា។

គម្រោងនេះមានគោលបំណងសំខាន់ ក្នុងការកាត់បន្ថយហានិភ័យទឹកជំនន់នៅរាជធានីភ្នំពេញ និងធ្វើឱ្យប្រសើរឡើងប្រព័ន្ធបង្ហូរទឹក ដើម្បីឆ្លើយតបទៅនឹងបញ្ហាជំនន់ទឹកភ្លៀង និងការរីកចម្រើនរហ័សនៃទីក្រុង។

ការគាំទ្រពីរដ្ឋាភិបាលជប៉ុន ត្រូវបានចាត់ទុកថា ជាជំហានសំខាន់មួយ ក្នុងការជំរុញសមត្ថភាពគ្រប់គ្រងហានិភ័យធម្មជាតិ និងលើកកម្ពស់គុណភាពជីវិតរបស់ប្រជាពលរដ្ឋនៅរាជធានីភ្នំពេញ ខណៈកំពុងប្រឈមបញ្ហាជំនន់ទឹកជាញឹកញាប់នៅរដូវវស្សា។

គួរបញ្ជាក់ថា ជប៉ុនគឺជាដៃគូអភិវឌ្ឍន៍សំខាន់មួយរបស់កម្ពុជា ដែលបានចូលរួមយ៉ាងសកម្ម ក្នុងគម្រោងហេដ្ឋារចនាសម្ព័ន្ធធំៗជាច្រើន រួមទាំងផ្លូវ ស្ពាន និងប្រព័ន្ធគ្រប់គ្រងទឹកនានា៕