មន្ត្រីនគរបាលគប់កែវស្រាចំមុខកម្មករចាប់ទឹកកក ស្នងការបញ្ជាឲ្យចាត់ការតាមច្បាប់ភ្លាមៗ

(កំពត)៖ ហេតុការណ៍មួយដែលបង្កការភ្ញាក់ផ្អើល និងការរិះគន់ពីសាធារណជនបានកើតឡើងនៅវេលាម៉ោងប្រមាណ១១យប់ ថ្ងៃទី១៩ ខែមេសា ឆ្នាំ២០២៦ ស្ថិតក្នុងភូមិអណ្ដូងខ្មែរ សង្កាត់អណ្ដូងខ្មែរ ក្រុងកំពត ខេត្តកំពត ខណៈស្ត្រីម្នាក់ជាកម្មករចាប់ទឹកកកតាមកម្មវិធី ត្រូវបានមន្ត្រីនគរបាលម្នាក់គប់កែវស្រាចំមុខ បណ្ដាលឲ្យរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់ភ្លាមៗ។

តាមប្រភពពីប្រជាពលរដ្ឋនៅកន្លែងកើតហេតុបានឲ្យដឹងថា ជនរងគ្រោះឈ្មោះ ទិត្យ ធូ បានចូលរួមបំពេញការងារចាប់ទឹកកកក្នុងកម្មវិធីមួយនៅបុរីកុសល្យ មុីរៀល អុីស្ទេត ឯ.ក.។ ខណៈពេលកម្មវិធីជិតបញ្ចប់ ជនបង្កដែលគេស្គាល់ថា ជាមន្ត្រីនគរបាលបម្រើការងារនៅអធិការដ្ឋាននគរបាលក្រុងកំពត ឈ្មោះ ទេព សុខផេង បានបង្ហាញអាកប្បកិរិយាខឹងសម្បារដោយសារតែទឹកកកមកយឺត ហើយបានយកកែវស្រាគប់ទៅលើជនរងគ្រោះតែម្ដង។

អំពើនោះបានបណ្ដាលឲ្យជនរងគ្រោះបែកក្បាល ហូរឈាមពេញមុខ និងរងរបួសក្រោមភ្នែកខាងឆ្វេង ដែលសំណាងល្អមិនប៉ះពាល់ដល់ភ្នែក។ បន្ទាប់ពីកើតហេតុ ក្រុមការងារបានជួយដឹកជញ្ជូនទៅមន្ទីរពេទ្យ ដើម្បីសង្គ្រោះជាបន្ទាន់។

ប្រភពដដែលបន្តថា ភាគីជនបង្កបានព្យាយាមសម្របសម្រួល ដោយផ្តល់សំណងចំនួនប្រមាណ ២លាន ៥០ម៉ឺនរៀល ដើម្បីបញ្ចប់រឿង ប៉ុន្តែជនរងគ្រោះមិនព្រមទទួលយកនោះទេ។

ជុំវិញករណីនេះ នៅព្រឹកថ្ងៃទី២១ ខែមេសា ឆ្នាំ២០២៦ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានបង្ហោះលើបណ្ដាញសង្គមភ្ជាប់ជាមួយរូបភាពជនសង្ស័យដែលដៃជាប់ខ្នោះ ដោយបញ្ជាក់ថា លោកបានបញ្ជាឲ្យអធិការក្រុងកំពតនាំខ្លួនជនពាក់ព័ន្ធមកអនុវត្តតាមច្បាប់ដោយគ្មានការលើកលែង។ ទន្ទឹមនឹងនេះ លោកក៏បានបញ្ជាក់ថា ការយឺតយ៉ាវក្នុងការចាត់ការដំបូង គឺដោយសារជនរងគ្រោះមិនទាន់បានដាក់ពាក្យបណ្ដឹងជាផ្លូវការ។

ករណីនេះ សាធារណជនបានលើកឡើងពីសីលធម៌ និងវិន័យរបស់មន្ត្រីអនុវត្តច្បាប់ ដែលត្រូវតែជាគំរូល្អក្នុងសង្គម។ មន្ត្រីដែលពាក់ព័ន្ធនឹងអំពើហិង្សាទៅលើប្រជាពលរដ្ឋ មិនត្រឹមតែប៉ះពាល់ដល់ជនរងគ្រោះប៉ុណ្ណោះទេ ប៉ុន្តែថែមទាំងប៉ះពាល់ដល់ភាពជឿជាក់របស់សាធារណជនចំពោះស្ថាប័នផងដែរ។

ក្នុងន័យនេះ ការចាត់វិធានការយ៉ាងតឹងរឹង និងមានតម្លាភាព គឺជាចំណុចសំខាន់ ដើម្បីបញ្ជាក់ថា ច្បាប់គឺសម្រាប់គ្រប់គ្នា និងគ្មាននរណាអាចឈរលើច្បាប់បានឡើយ៕