លោកឧត្តមសេនីយ៍ស្នងការ ឈឿន សុចិត្ត ថ្វាយព្រះពរជូនព្រះមហាក្សត្រ ក្នុងឱកាសព្យាបាលព្រះរោគនៅចិន

(កណ្ដាល)៖ លោកឧត្ដមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្ដាល និងក្រុមគ្រួសារ រួមទាំងថ្នាក់ដឹកនាំ និងមន្ត្រីក្រោមឱវាទទាំងអស់ នៅថ្ងៃទី១៨ ខែមេសា ឆ្នាំ២០២៦ បានសម្តែងនូវគារវកិច្ចដ៏ខ្ពង់ខ្ពស់បំផុត ដោយលំឱនកាយក្រាបអភិវន្ទន៍ និងថ្វាយព្រះពរជូន ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសដែលព្រះអង្គយាងទៅទទួលការវះកាត់ព្យាបាលព្រះរោគ នៅសាធារណរដ្ឋប្រជាមានិតចិន។

ក្នុងសារថ្វាយព្រះពរ ដែលបានបង្ហាញពីស្មារតីគោរពសក្ការៈ និងភាពស្មោះត្រង់យ៉ាងជ្រាលជ្រៅ លោកឧត្ដមសេនីយ៍ទោ ឈឿន សុចិត្ត តាំងនាមមន្ត្រីនគរបាលខេត្តកណ្តាល បានលើកហត្ថប្រណម្យ បួងសួងដល់ព្រះរតនត្រ័យ និងវត្ថុស័ក្តិសិទ្ធទាំងឡាយក្នុងលោក ព្រមទាំងទេវតារក្សាព្រះមហាស្វេតច្ឆត្រ សូមជួយប្រោះព្រំជ័យមង្គល និងសិរីសួស្តីគ្រប់ប្រការ ថ្វាយព្រះមហាក្សត្រ។

សារនេះ លោកឧត្ដមសេនីយ៍ទោស្នងការក៏បានបញ្ជាក់យ៉ាងច្បាស់ពីក្តីបារម្ភ និងសេចក្តីសង្ឃឹមថា ព្រះអង្គនឹងទទួលបានជោគជ័យក្នុងការព្យាបាលព្រះរោគ និងត្រឡប់មកកាន់មាតុភូមិវិញ ដោយមានព្រះរាជសុខភាពល្អបរិបូរណ៍ ព្រះកាយពលមាំមួន និងព្រះបញ្ញាញាណភ្លឺថ្លា។

ជាមួយគ្នានេះ លោកឧត្ដមសេនីយ៍ទោ ឈឿន សុចិត្ត និងមន្ត្រីនគរបាលក្រោមឱវាទទាំងអស់បានបន្តថ្វាយព្រះពរឲ្យព្រះអង្គមានព្រះជន្មាយុយឺនយូរ ដើម្បីបន្តបំពេញព្រះរាជកិច្ចដ៏ឧត្តុង្គឧត្តម សម្រាប់ផលប្រយោជន៍ជាតិមាតុភូមិ និងប្រជារាស្ត្រខ្មែរ ពិសេសក្នុងនាមជាព្រះនិមិត្តរូបនៃឯករាជ្យ ឯកភាពជាតិ អធិបតេយ្យភាព និងបូរណភាពទឹកដី។

អត្ថន័យស្នូលនៃសារនេះ មិនត្រឹមតែបង្ហាញពីក្តីគោរពប៉ុណ្ណោះទេ ប៉ុន្តែថែមទាំងបញ្ជាក់ពីភាពរួបរួម និងស្មារតីស្មោះត្រង់របស់មន្ត្រីនគរបាលចំពោះស្ថាប័នជាតិ និងព្រះមហាក្សត្រ ដែលជាម្លប់ដ៏សុខដុមសម្រាប់ប្រជាជាតិខ្មែរ។

ក្នុងនាមជាស្ថាប័នអនុវត្តច្បាប់ ស្នងការដ្ឋាននគរបាលខេត្តកណ្តាល បានបង្ហាញគំរូវិជ្ជាជីវៈ និងក្រមសីលធម៌ ក្នុងការរួមចំណែកថែរក្សាតម្លៃជាតិ និងបង្ហាញពីការគោរពយ៉ាងខ្ពង់ខ្ពស់ចំពោះស្ថាប័នព្រះមហាក្សត្រ ដែលជាស្នូលនៃស្ថេរភាព និងអភិវឌ្ឍន៍ជាតិ៕