អភិបាលខេត្តកណ្តាលជួបសំណេះសំណាលកងអង្គរក្ស ពង្រឹងសន្តិសុខ និងលើកទឹកចិត្តក្នុងឱកាសចូលឆ្នាំថ្មី

(កណ្តាល)៖ ក្នុងឱកាសបុណ្យចូលឆ្នាំប្រពៃណីជាតិខ្មែរ នាព្រឹកថ្ងៃទី១៦ ខែមេសា ឆ្នាំ២០២៦ ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល បានអញ្ជើញសំណេះសំណាលជាមួយនាយទាហាន នាយទាហានរង និងពលទាហាន នៃបញ្ជាការដ្ឋានកងអង្គរក្ស ស្ថិតនៅភូមិទួលក្រសាំង សង្កាត់តាខ្មៅ ក្រុងតាខ្មៅ។

ក្នុងមតិសំណេះសំណាល ឯកឧត្តមអភិបាលខេត្ត បានសម្តែងការកោតសរសើរយ៉ាងខ្ពង់ខ្ពស់ចំពោះស្មារតីលះបង់ និងការបំពេញភារកិច្ចយ៉ាងមានប្រសិទ្ធភាពរបស់កងកម្លាំងអង្គរក្ស ក្នុងការការពារសន្តិសុខ សណ្តាប់ធ្នាប់សាធារណៈ និងសុវត្ថិភាពជូនថ្នាក់ដឹកនាំជាន់ខ្ពស់ជាតិ។

ឯកឧត្តមបានបញ្ជាក់ថា កងអង្គរក្ស គឺជាកម្លាំងស្នូលសំខាន់មួយ ក្នុងការធានាសន្តិភាព និងស្ថិរភាព ដែលជាគ្រឹះមូលដ្ឋានសម្រាប់ការអភិវឌ្ឍខេត្ត និងប្រទេសជាតិឱ្យរីកចម្រើនជាបន្តបន្ទាប់។

ជាមួយគ្នានេះ ឯកឧត្តមក៏បានថ្លែងអំណរគុណចំពោះកិច្ចសហការល្អរបស់បញ្ជាការដ្ឋានកងអង្គរក្ស ជាមួយគណៈបញ្ជាការឯកភាពរដ្ឋបាលខេត្ត ក្នុងការថែរក្សាសន្តិសុខ និងចូលរួមជួយសង្គ្រោះប្រជាពលរដ្ឋក្នុងគ្រោះអាសន្ន ដូចជា ទឹកជំនន់ និងអគ្គីភ័យ កន្លងមក។ ព្រមទាំងបានសំណូមពរឲ្យបន្តពង្រឹងកិច្ចសហការនេះ ដើម្បីឆ្លើយតបឱ្យទាន់ពេលវេលា នៅពេលមានគ្រោះមហន្តរាយនានាកើតឡើង។

ក្នុងឱកាសនោះផងដែរ ឯកឧត្តមអភិបាលខេត្ត បានឧបត្ថម្ភទឹកសុទ្ធ ភេសជ្ជៈ និងថវិកាមួយចំនួន ជូនដល់បញ្ជាការដ្ឋានកងអង្គរក្ស ដើម្បីលើកទឹកចិត្ត និងជាអំណោយអនុស្សាវរីយ៍ ក្នុងឱកាសចូលឆ្នាំថ្មីប្រពៃណីជាតិខ្មែរ៕