ខេត្តកណ្តាលរឹតបន្តឹងសន្តិសុខ! កម្លាំងនគរបាលចេញពេញផ្លូវ សម្រួលចរាចរណ៍ និងការពារបុណ្យចូលឆ្នាំ

(កណ្តាល)៖ ដើម្បីធានាឲ្យការប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ ប្រព្រឹត្តទៅដោយសុវត្ថិភាព និងរលូន កម្លាំងនគរបាលខេត្តកណ្តាល ត្រូវបានដាក់ពង្រាយយ៉ាងទូលំទូលាយ តាមគោលដៅសំខាន់ៗ ទាំងផ្លូវធំៗ វត្តអារាម និងតំបន់កម្សាន្តនានា។

នៅថ្ងៃពុធ ទី១៥ ខែមេសា ឆ្នាំ២០២៦ វិធានការនេះ អនុវត្តតាមបទបញ្ជារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម គួច ចំរើន អភិបាល នៃគណៈអភិបាលខេត្តកណ្តាល។

ក្នុងនោះ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានដាក់បទបញ្ជាឲ្យកម្លាំងក្រោមឱវាទ តាមបណ្តោយស្រុក និងក្រុងទាំងអស់ បង្កើនការយកចិត្តទុកដាក់ខ្ពស់ លើការសម្រួលចរាចរណ៍ នៅតំបន់ងាយកកស្ទះ និងពង្រឹងការពារសន្តិសុខនៅតាមវត្តអារាម និងទីកន្លែងប្រជាពលរដ្ឋមកកម្សាន្តយ៉ាងច្រើន។

ជាមួយគ្នានេះ កម្លាំងនគរបាលក៏ត្រូវបានណែនាំឲ្យត្រៀមខ្លួនឆាប់រហ័ស ក្នុងការឆ្លើយតបរាល់ហេតុការណ៍បន្ទាន់ ដើម្បីធានាថា ប្រជាពលរដ្ឋអាចលេងកម្សាន្តបានដោយសុវត្ថិភាព ស្ងប់ស្ងាត់ និងមានសណ្តាប់ធ្នាប់ល្អ។

វិធានការយ៉ាងតឹងរឹងនេះ គឺសំដៅបង្កើតបរិយាកាសល្អប្រសើរ ជូនប្រជាពលរដ្ឋ ក្នុងឱកាសបុណ្យចូលឆ្នាំថ្មី ឲ្យក្លាយជាពេលវេលានៃភាពរីករាយ ក្តីសុខ និងគ្មានការព្រួយបារម្ភ៕