ឯកឧត្តម គួច ចំរើន៖កងកម្លាំងប្រដាប់អាវុធគឺជាខ្នងបង្អែកដ៏សំខាន់ក្នុងការរក្សាសុវត្ថិភាពសង្គម

(កណ្តាល)៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានថ្លែងកោតសរសើរយ៉ាងខ្ពស់ដល់ទាំងនគរបាលខេត្តកណ្ដាល និងកម្លាំងកងរាជអាវុធហត្ថខេត្តកណ្ដាលដែលបានខិតខំបំពេញតួនាទីភារកិច្ចរបស់ខ្លួនយ៉ាងសកម្ម និងមានប្រសិទ្ធភាព ក្នុងការបង្ការ ការពារ និងទប់ស្កាត់បទល្មើសគ្រប់ប្រភេទ ធានាបាននូវសន្តិសុខ សុវត្ថិភាព ស្ថេរភាព និងសណ្ដាប់ធ្នាប់សាធារណៈនៅទូទាំងភូមិសាស្ត្រខេត្តកណ្ដាល។

ការថ្លែងកោតសរសើររបស់ឯកឧត្តមអភិបាលខេត្តនៅព្រឹកថ្ងៃទី១៥ ខែមេសា ឆ្នាំ២០២៦ ក្នុងពិធីសំណេះសំណាល និងត្រួតពិនិត្យកងកម្លាំងទាំងនគរបាលខេត្តនិងកងរាជអាវុធហត្ថ នាឱកាសបុណ្យចូលឆ្នាំប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ ២៥៦៩។

ឯកឧត្តម គួច ចំរើន បានបញ្ជាក់ថា កងកម្លាំងប្រដាប់អាវុធគឺជាខ្នងបង្អែកដ៏សំខាន់ក្នុងការរក្សាសុវត្ថិភាពសង្គម ដោយនៅពេលដែលប្រជាពលរដ្ឋធ្វើការ កម្លាំងក៏បំពេញភារកិច្ចដែរ ហើយនៅពេលមានថ្ងៃឈប់សម្រាក ឬពិធីបុណ្យធំៗ កម្លាំងត្រូវបន្តធ្វើការលើសទ្វេដង ដើម្បីធានាសុវត្ថិភាពជូនប្រជាពលរដ្ឋ។

ជាពិសេស ខេត្តកណ្ដាលជាតំបន់មានសារៈសំខាន់ផ្នែកភូមិសាស្ត្រ ជាច្រកផ្លូវភ្ជាប់ពីរាជធានីភ្នំពេញ ទៅកាន់បណ្ដាខេត្តនានា ដែលមានចរាចរណ៍ច្រើនក្នុងអំឡុងពេលបុណ្យចូលឆ្នាំ។ ដូច្នេះ កងកម្លាំងត្រូវត្រៀមខ្លួន និងអនុវត្តការងារសម្រួលលំហូរចរាចរណ៍នៅតាមគោលដៅសំខាន់ៗ ឲ្យមានភាពរលូន បញ្ចៀសការកកស្ទះ និងធានាសុវត្ថិភាពក្នុងការធ្វើដំណើររបស់ប្រជាពលរដ្ឋទៅមកស្រុកកំណើត។

សកម្មភាព និងការលះបង់របស់កម្លាំងនគរបាល កម្លាំងកងរាជអាវុធហត្ថខេត្តកណ្ដាលបានបង្ហាញពីភាពមានវិន័យ ការទទួលខុសត្រូវខ្ពស់ និងសមត្ថភាពអនុវត្តការងារយ៉ាងវិជ្ជាជីវៈ ដែលរួមចំណែកយ៉ាងសំខាន់ក្នុងការពង្រឹងសន្តិសុខសង្គម និងបង្កើនទំនុកចិត្តរបស់ប្រជាពលរដ្ឋ៕