លើកទឹកចិត្តខ្លាំង! អភិបាលខេត្តកណ្ដាលកោតសរសើរ និងឧបត្ថម្ភកម្លាំងនគរបាលក្នុងឱកាសចូលឆ្នាំថ្មី

(កណ្តាល)៖ នៅព្រឹកថ្ងៃពុធ ទី១៥ ខែមេសា ឆ្នាំ២០២៦ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាលបានដឹកនាំកងកម្លាំងនៃស្នងការដ្ឋាននគរបាលខេត្ត រៀបចំពិធីទទួលស្វាគមន៍ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល អញ្ជើញជាអធិបតី ក្នុងពិធីសំណេះសំណាលសួរសុខទុក្ខកងកម្លាំងនគរបាល ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ។

ក្នុងឱកាសនោះ ឯកឧត្តម គួច ចំរើន បានថ្លែងកោតសរសើរយ៉ាងខ្ពស់ដល់កម្លាំងនគរបាលខេត្តកណ្ដាល ដែលបានខិតខំបំពេញតួនាទីភារកិច្ចយ៉ាងសកម្ម ក្នុងការបង្ការ ការពារ និងទប់ស្កាត់បទល្មើសគ្រប់ប្រភេទ ធានាបាននូវសន្តិសុខ សុវត្ថិភាព ស្ថិរភាព និងសណ្ដាប់ធ្នាប់សាធារណៈនៅទូទាំងភូមិសាស្ត្រខេត្តកណ្ដាលកន្លងមក។

ឯកឧត្តមអភិបាលខេត្តបានបញ្ជាក់បន្ថែមថា កម្លាំងនគរបាលគឺជាខ្នងបង្អែកដ៏សំខាន់ក្នុងការរក្សាសុវត្ថិភាពសង្គម ជាពិសេសនៅពេលបុណ្យទាន ឬថ្ងៃឈប់សម្រាកធំៗ ដែលប្រជាពលរដ្ឋភាគច្រើនបានសម្រាក ប៉ុន្តែកងកម្លាំងត្រូវបន្តបំពេញភារកិច្ចយ៉ាងមមាញឹក និងខិតខំជាងធម្មតា។ ដោយសារខេត្តកណ្ដាលមានភូមិសាស្ត្រសំខាន់ ជាច្រកផ្លូវភ្ជាប់ពីរាជធានីភ្នំពេញទៅបណ្ដាខេត្តនានា ដូច្នេះកម្លាំងត្រូវយកចិត្តទុកដាក់ខ្ពស់ ក្នុងការសម្រួលចរាចរណ៍តាមគោលដៅងាយកកស្ទះ ដើម្បីធានាលំហូរចរាចរណ៍រលូន និងបញ្ចៀសហានិភ័យផ្សេងៗ ជូនប្រជាពលរដ្ឋក្នុងអំឡុងពេលធ្វើដំណើរទៅមកស្រុកកំណើត។

ជាការលើកទឹកចិត្ត និងគាំទ្រដល់កម្លាំងជួរមុខ ឯកឧត្តមអភិបាលខេត្ត ក៏បានឧបត្ថម្ភថវិកាចំនួន ៤០,០០០,០០០ រៀល ទឹកបរិសុទ្ធ៣០០កេស ភេសជ្ជៈ ១០០កេស ព្រមទាំងប្រេងឥន្ធនៈ ជូនដល់កងកម្លាំងនគរបាល នៃស្នងការដ្ឋាននគរបាលខេត្តកណ្ដាល ដើម្បីប្រើប្រាស់ក្នុងការបំពេញភារកិច្ច និងអបអរសាទរឱកាសបុណ្យចូលឆ្នាំថ្មីប្រពៃណីជាតិខ្មែរ។

ពិធីនេះ បានបង្ហាញពីការយកចិត្តទុកដាក់ និងការគាំទ្រយ៉ាងជាក់ស្តែងពីថ្នាក់ដឹកនាំខេត្ត ចំពោះកម្លាំងនគរបាល ដែលជាអង្គភាពស្នូលក្នុងការរក្សាសន្តិសុខ សុវត្ថិភាព និងស្ថិរភាពសង្គម ឲ្យមានភាពរឹងមាំ និងជឿជាក់ពីសំណាក់ប្រជាពលរដ្ឋ៕