អបអរសាទរ! រដ្ឋបាលស្រុកខ្សាច់កណ្ដាលគ្រប់គ្រងសន្តិសុខ សណ្ដាប់ធ្នាប់ និងសុវត្ថិភាពសាធារណៈបានយ៉ាងល្អប្រសើរ នៅថ្ងៃដំបូងនៃនគរសង្គ្រាន្ត២០២៦

(កណ្តាល)៖ នៅថ្ងៃទី១ នៃពិធីនគរសង្គ្រាន្តឆ្នាំ២០២៦ ត្រូវនឹងថ្ងៃទី១៤ ខែមេសា ឆ្នាំ២០២៦ រដ្ឋបាលស្រុកខ្សាច់កណ្ដាល ក្រោមការដឹកនាំយ៉ាងយកចិត្តទុកដាក់ពីលោក ចេង ឌីណា អភិបាលស្រុក និងជាប្រធានគណបញ្ជាការឯកភាពស្រុក បានបំពេញភារកិច្ចគ្រប់គ្រងសន្តិសុខ សណ្ដាប់ធ្នាប់ និងសុវត្ថិភាពសាធារណៈបានយ៉ាងល្អប្រសើរ បង្កើតបរិយាកាសសុខសាន្ត និងមានរបៀបរៀបរយទូទាំងស្រុក។

តាមការអនុវត្តផែនការយ៉ាងម៉ឺងម៉ាត់ កម្លាំងមានសមត្ថកិច្ចគ្រប់ផ្នែក ត្រូវបានដាក់ពង្រាយតាមគោលដៅសំខាន់ៗ ដើម្បីធានាសុវត្ថិភាពជូនប្រជាពលរដ្ឋ និងភ្ញៀវទេសចរណ៍ ដែលបានចូលរួមអបអរសាទរបុណ្យប្រពៃណីជាតិ។ ជាពិសេស ការរៀបចំសម្រួលចរាចរណ៍ត្រូវបានអនុវត្តយ៉ាងមានប្រសិទ្ធភាព ធ្វើឲ្យការធ្វើដំណើររបស់បងប្អូនប្រជាពលរដ្ឋមានភាពរលូន កាត់បន្ថយការកកស្ទះ និងហានិភ័យគ្រោះថ្នាក់ចរាចរណ៍នៅចំណុចរង្វង់មូលស្ពានព្រែកតាមាក់ ក្នុងភូមិសាស្រ្តស្រុកខ្សាច់កណ្តាល។

លោក ចេង ឌីណា ក៏បានអំពាវនាវដល់ប្រជាពលរដ្ឋទាំងអស់ ឲ្យបន្តគោរពច្បាប់ចរាចរណ៍ និងអនុវត្តវិធានសុវត្ថិភាពនានា ក្នុងអំឡុងពេលបុណ្យចូលឆ្នាំថ្មី ដើម្បីរួមចំណែកថែរក្សាសណ្ដាប់ធ្នាប់សាធារណៈ និងការពារសុវត្ថិភាពផ្ទាល់ខ្លួន និងសហគមន៍។

គួរបញ្ជាក់ថា ក្នុងថ្ងៃដំបូងនេះ ស្ថានការណ៍សន្តិសុខទូទៅនៅស្រុកខ្សាច់កណ្ដាល មានភាពល្អប្រសើរ ដោយមិនមានបញ្ហាក្មេងទំនើង ឬហេតុការណ៍អវិជ្ជមានណាមួយគួរឲ្យកត់សម្គាល់ឡើយ ដែលបង្ហាញពីប្រសិទ្ធភាពនៃការដឹកនាំ និងការសហការល្អរវាងអាជ្ញាធរ និងកម្លាំងពាក់ព័ន្ធ។

សមិទ្ធផលនេះ គឺជាការបញ្ជាក់ច្បាស់ពីសមត្ថភាព និងការទទួលខុសត្រូវខ្ពស់របស់រដ្ឋបាលស្រុកខ្សាច់កណ្ដាល ក្នុងការបម្រើប្រជាពលរដ្ឋ និងថែរក្សាសន្តិសុខសង្គមឲ្យមានភាពរឹងមាំ និងនិរន្តរភាព៕