អភិបាលខេត្តកណ្ដាលដឹកនាំពិធីទទួលទេវតា បង្ហាញសាមគ្គីភាព និងអត្តសញ្ញាណខ្មែរ

(កណ្ដាល)៖ ថ្នាក់ដឹកនាំរដ្ឋបាលខេត្តកណ្ដាលបានរៀបចំពិធីទទួលទេវតាឆ្នាំថ្មី ព្រះនាម «រាក្យសាទេវី» ជាបុត្រីទី៣ នៃកបិលមហាព្រហ្ម ក្នុងឱកាសឆ្នាំមមី អដ្ឋស័ក ព.ស.២៥៦៩ ឈានចូល ព.ស.២៥៧០ គ.ស.២០២៦ នៅសួនច្បារមាត់ទន្លេបាសាក់ ក្រុងតាខ្មៅ នាព្រឹកថ្ងៃទី១៤ ខែមេសា ឆ្នាំ២០២៦។

ពិធីនេះបានប្រព្រឹត្តទៅក្រោមអធិបតីភាព ឯកឧត្តម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្តម គួច ចំរើន អភិបាលនៃគណៈអភិបាលខេត្តកណ្ដាល ព្រមទាំងមានការចូលរួមពីសមាជិកក្រុមប្រឹក្សាខេត្ត គណៈអភិបាលខេត្ត មន្ត្រីរាជការ អាជ្ញាធរមូលដ្ឋាន និងប្រជាពលរដ្ឋយ៉ាងច្រើនកុះករ បង្ហាញពីស្មារតីរួបរួម និងការគោរពប្រពៃណីជាតិយ៉ាងខ្ពង់ខ្ពស់។

ពិធីទទួលទេវតាឆ្នាំថ្មី បានប្រព្រឹត្តទៅតាមពេលវេលាប្រពៃណី គឺវេលាម៉ោង ១០និង៤៨នាទី ព្រឹកថ្ងៃដដែល ដោយមានការរៀបចំពិធីបូជាពលិការ ថ្វាយព្រះរតនត្រ័យ និងសូមពរជ័យសិរីសួស្តីជូនប្រជាពលរដ្ឋទូទាំងប្រទេស។ ជាមួយគ្នានេះ ក៏មានការសម្ដែងរបាំត្រុដិ និងរបាំជូនពរ ដើម្បីបណ្ដេញឧបទ្រពចង្រៃ និងនាំមកនូវសេចក្តីសុខសាន្ត សុភមង្គលដល់គ្រប់គ្រួសារ។

ពិធីប្រពៃណីដ៏មានតម្លៃនេះ បានបង្ហាញពីការយកចិត្តទុកដាក់របស់អាជ្ញាធរខេត្ត ក្នុងការអភិរក្ស និងលើកតម្កើងអត្តសញ្ញាណវប្បធម៌ខ្មែរ ព្រមទាំងជំរុញឱ្យប្រជាពលរដ្ឋចូលរួមថែរក្សាប្រពៃណីបុរាណឱ្យបានគង់វង្សសម្រាប់ជំនាន់ក្រោយ។

ក្នុងឱកាសដ៏វិសេសវិសាលនេះ រដ្ឋបាលខេត្តកណ្ដាលក៏បានបួងសួងដល់គុណបុណ្យព្រះរតនត្រ័យ និងទេវតាឆ្នាំថ្មី ព្រះនាម «រាក្យសាទេវី» សូមជួយបីបាច់ថែរក្សាប្រជាពលរដ្ឋខ្មែរទាំងអស់ ឱ្យទទួលបានសេចក្តីសុខសុភមង្គល សុខភាពល្អ កម្លាំងមាំមួន ជោគជ័យក្នុងជីវភាព និងពោរពេញដោយពរទាំងប្រាំប្រការ គឺ អាយុ វណ្ណៈ សុខៈ ពលៈ និងបដិភាណៈ ដោយកុំបីឃ្លៀងឃ្លាតឡើយ៕