អភិបាលខេត្តកណ្ដាលព្រមាន! ចូលឆ្នាំកុំបាញ់ទឹកប៉ាតម្សៅលើផ្លូវ ខណៈសម្ពោធសមិទ្ធផលធំៗនៅវត្តអង្គស្លែង

(កណ្ដាល)៖ នៅព្រឹកថ្ងៃទី១៣ ខែមេសា ឆ្នាំ២០២៦ ឯកឧត្តម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្តម គួច ចំរើន អភិបាលខេត្តកណ្ដាល បានអញ្ជើញជាអធិបតីក្នុងពិធីសម្ពោធសមិទ្ធផលនានា នៅវត្តអង្គស្លែង ស្ថិតក្នុងស្រុកពញាឮ ដោយមានការចូលរួមពីថ្នាក់ដឹកនាំ មន្ត្រីរាជការ ព្រះសង្ឃ និងពុទ្ធបរិស័ទជាច្រើន។

ក្នុងឱកាសនោះ ឯកឧត្តម គួច ចំរើន បានកោតសរសើររដ្ឋបាលស្រុកពញាឮ ដែលបានខិតខំបម្រើសេវាសាធារណៈជូនប្រជាពលរដ្ឋយ៉ាងមានប្រសិទ្ធភាព ជាពិសេសការជំរុញធ្វើអត្តសញ្ញាណបណ្ណសញ្ជាតិខ្មែរ និងការរក្សាសុវត្ថិភាពសណ្តាប់ធ្នាប់នៅមូលដ្ឋាន។

ជាមួយគ្នានេះ ឯកឧត្តមក៏បានថ្លែងអំណរគុណដល់ព្រះចៅអធិការវត្ត អាជ្ញាធរ និងសប្បុរសជនទាំងអស់ ដែលបានរួមចំណែកកសាងសមិទ្ធផលក្នុងវត្ត ព្រមទាំងអរគុណរដ្ឋាភិបាលចិន ដែលបានឧបត្ថម្ភប្រព័ន្ធទឹកស្អាត ផ្គត់ផ្គង់ដល់ប្រជាពលរដ្ឋប្រមាណ១០០គ្រួសារ។

ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឯកឧត្តមអភិបាលខេត្ត បានអំពាវនាវឱ្យប្រជាពលរដ្ឋចូលរួមលេងល្បែងប្រជាប្រិយខ្មែរ ដោយគោរពវប្បធម៌ និងជៀសវាងការបាញ់ទឹក ប៉ាតម្សៅតាមផ្លូវ ដែលអាចបង្កគ្រោះថ្នាក់ និងរំខានចរាចរណ៍។

ជាមួយនេះ ឯកឧត្តមអភិបាលខេត្តក៏បានណែនាំឱ្យប្រុងប្រយ័ត្នអគ្គិភ័យ ការធ្វើដំណើរ និងចូលរួមរក្សាអនាម័យបរិស្ថាន ដើម្បីអបអរសាទរពិធីបុណ្យឲ្យប្រកបដោយសុវត្ថិភាព និងសោភ័ណភាព៕