មុនសង្រ្កាន្ត! កម្លាំងអាវុធហត្ថកំពង់ស្ពឺទទួលបានការលើកទឹកចិត្តយ៉ាងកក់ក្តៅពីលោកឧត្តមសេនីយ៍មេបញ្ជាការ ម៉េង ស្រ៊ុន 

(កំពង់ស្ពឺ)៖ ក្នុងឱកាសអបអរសាទរបុណ្យចូលឆ្នាំថ្មីប្រពៃណីជាតិខ្មែរ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺបានអញ្ជើញជាអធិបតីក្នុងពិធីសំណេះសំណាលជាមួយយោធិន និងយោធិនសោធននិវត្តន៍ នៅថ្ងៃទី១១ ខែមេសា ឆ្នាំ២០២៦ ដោយមានការចូលរួមពីមន្ត្រីគ្រប់លំដាប់ថ្នាក់យ៉ាងច្រើនកុះករ។

ពិធីនេះបានប្រព្រឹត្តទៅក្នុងបរិយាកាសកក់ក្តៅ និងសាមគ្គីភាព ដោយលោកមេបញ្ជាការបានថ្លែងកោតសរសើរ និងអរគុណដល់កងកម្លាំងទាំងអស់ ដែលបានលះបង់កម្លាំងកាយចិត្ត និងពេលវេលា ក្នុងការបំពេញភារកិច្ចការពារសន្តិសុខ សុវត្ថិភាព និងរក្សាសណ្តាប់ធ្នាប់សង្គម ជូនប្រជាពលរដ្ឋក្នុងខេត្តកំពង់ស្ពឺ។

ជាមួយគ្នានេះ លោកឧត្តមសេនីយ៍ត្រី ម៉េង ស្រ៊ុន ក៏បានពាំនាំនូវសារសួរសុខទុក្ខ និងពាក្យជូនពរពីថ្នាក់ដឹកនាំជាន់ខ្ពស់ ជូនដល់កងកម្លាំងទាំងអស់ និងក្រុមគ្រួសារ ក្នុងឱកាសឆ្នាំថ្មីផងដែរ។

ដើម្បីជាការលើកទឹកចិត្ត លោកមេបញ្ជាការបានឧបត្ថម្ភអំណោយជូនយោធិនម្នាក់ៗ រួមមាន៖ ទឹកបរិសុទ្ធ ភេសជ្ជៈ អាវរងារ មី និងចេក ខណៈយោធិនសោធននិវត្តន៍ ទទួលបានថវិកា និងគ្រឿងឧបភោគបរិភោគជាច្រើន។

ទន្ទឹមនោះ លោកឧត្តមសេនីយ៍ត្រី ម៉េង ស្រ៊ុន បានជូនពរដល់យោធិន និងនិវត្តន៍ជនទាំងអស់ ព្រមទាំងក្រុមគ្រួសារ សូមឲ្យទទួលបានសុខភាពល្អ សេចក្តីសុខ សំណាងល្អ និងជោគជ័យគ្រប់ភារកិច្ច ក្នុងឆ្នាំថ្មីនេះ៕