បែកធ្លាយរត់ពន្ធបារីតាមច្រក «ស្ពានដែក»! ឃាត់កម្មករ៤នាក់ សង្ស័យមានមេខ្លោងនៅពីក្រោយ

(បាត់ដំបង)៖ កម្លាំងសមត្ថកិច្ចបានចុះអន្តរាគមន៍ និងឃាត់ខ្លួនកម្មករចំនួន៤នាក់ ក្រោយបែកធ្លាយវីដេអូបង្ហាញសកម្មភាពនាំបារីឆ្លងដែនខុសច្បាប់ តាមច្រក «ស្ពានដែក» ស្ថិតនៅភូមិអូដាលើ ឃុំបឹងរាំង ស្រុកកំរៀង ខេត្តបាត់ដំបង ដើម្បីសួរនាំ និងស្រាវជ្រាវរកប្រភពទំនិញ និងមេខ្លោងនៅពីក្រោយ។

ប្រភពព័ត៌មានបញ្ជាក់ថា សមត្ថកិច្ចកំពុងប្រមូលព័ត៌មានលម្អិតពីក្រុមកម្មករពាក់ព័ន្ធ ដើម្បីកំណត់អត្តសញ្ញាណម្ចាស់ទំនិញ និងអ្នកមានអំណាចដែលអាចជាអ្នកអនុញ្ញាតឱ្យមានសកម្មភាពនាំចេញ-នាំចូលតាមច្រកខាងលើ។ តំបន់នេះស្ថិតក្រោមការគ្រប់គ្រងរួមរបស់អង្គភាពជំនាញ រួមមាន នគរបាលអន្តោប្រវេសន៍ យោធាផ្នែកទំនាក់ទំនងព្រំដែន និងកងពលលេខ៥៣។

សកម្មភាពរត់ពន្ធបារីខុសច្បាប់នេះ មិនត្រឹមបង្កឱ្យរដ្ឋបាត់បង់ចំណូលពន្ធប៉ុណ្ណោះទេ ប៉ុន្តែថែមទាំងប៉ះពាល់ដល់សន្តិសុខ និងការគ្រប់គ្រងព្រំដែនផងដែរ។

មហាជនកំពុងរង់ចាំចំណាត់ការតឹងរឹងពីអាជ្ញាធរពាក់ព័ន្ធ ដើម្បីទប់ស្កាត់ និងវែកមុខបណ្ដាញមេខ្លោង ដែលសង្ស័យមានការគុបគិតអនុញ្ញាតឱ្យប្រព្រឹត្តបទល្មើសយ៉ាងអាណាធិបតេយ្យនៅតាមបន្ទាត់ព្រំដែន៕