ស្នងការខេត្តកណ្តាលចុះលើកទឹកចិត្តកងកម្លាំងព្រំដែន នាំអំណោយអបអរឆ្នាំថ្មី

(កណ្តាល)៖ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលនៅរសៀលថ្ងៃទី១១ ខែមេសា ឆ្នាំ២០២៦នេះ បានអញ្ជើញជាអធិបតីក្នុងពិធីសំណេះសំណាលជាមួយកងកម្លាំងវរៈសេនាតូចនគរបាលការពារព្រំដែនគោកលេខ៦០៥ ក្នុងឱកាសអបអរសាទរបុណ្យចូលឆ្នាំថ្មីប្រពៃណីជាតិខ្មែរ នៅទីបញ្ជាការវរៈសេនាតូច ស្ថិតក្នុងក្រុងសំពៅពូន។

ពិធីនេះធ្វើឡើងដោយអនុវត្តតាមបទបញ្ជាចង្អុលដឹកនាំរបស់ថ្នាក់ដឹកនាំជាន់ខ្ពស់ពីឯកឧត្តមឧបនាយករដ្ឋមន្ដ្រី ស សុខា ឯកឧត្តម នាយឧត្តមសេនីយ៍ ស ថេត និងឯកឧត្តម គួច ចំរើន ដោយមានគោលបំណងលើកទឹកចិត្ត និងបង្កើនសាមគ្គីភាពរវាងថ្នាក់ដឹកនាំ និងកងកម្លាំងនៅតាមបន្ទាត់ព្រំដែន។

ក្នុងឱកាសនោះ លោកស្នងការបានពាំនាំសារសួរសុខទុក្ខ និងការយកចិត្តទុកដាក់ពីថ្នាក់ដឹកនាំ ជូនដល់មន្ត្រីនគរបាលទាំងអស់ ព្រមទាំងបាននាំយកអំណោយជាថវិកា គ្រឿងឧបភោគបរិភោគ និងភេសជ្ជៈ ចែកជូនដល់កងកម្លាំងផងដែរ។

សកម្មភាពនេះ បង្ហាញពីការយកចិត្តទុកដាក់ និងការគាំទ្ររបស់ថ្នាក់ដឹកនាំចំពោះកងកម្លាំងការពារព្រំដែន ដែលកំពុងបំពេញភារកិច្ចការពារសន្តិសុខ និងអធិបតេយ្យភាពជាតិយ៉ាងមុតមាំក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ៕