អាវុធហត្ថខេត្តកំពង់ស្ពឺចាប់ខ្លួនជនសង្ស័យ ៩នាក់ ពាក់ព័ន្ធគ្រឿងញៀន ដកហូតវត្ថុតាងជាច្រើន បញ្ជូនទៅតុលាការ

(កំពង់ស្ពឺ)៖ កម្លាំងកងរាជអាវុធហត្ថខេត្តកំពង់ស្ពឺបានបើកប្រតិបត្តិការយ៉ាងតឹងរ៉ឹង ស្រាវជ្រាវ កំណត់មុខសញ្ញា និងបង្ក្រាបបទល្មើសគ្រឿងញៀន ដោយឃាត់ខ្លួនជនសង្ស័យសរុបចំនួន ៩នាក់ ព្រមទាំងដកហូតវត្ថុតាងជាច្រើន បញ្ជូនទៅកាន់សាលាដំបូងខេត្តកំពង់ស្ពឺ ដើម្បីចាត់ការតាមនីតិវិធីច្បាប់។

ប្រតិបត្តិការនេះ បានអនុវត្តក្រោមការដឹកនាំយ៉ាងម៉ឺងម៉ាត់របស់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងមានការណែនាំដោយផ្ទាល់ពី ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ជាពិសេសក្រោមការបញ្ជាដឹកនាំផ្ទាល់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ ព្រមទាំងមានការសម្របសម្រួលនីតិវិធីពីព្រះរាជអាជ្ញា អមសាលាដំបូងខេត្ត។

យោងតាមរបាយការណ៍កាលពីថ្ងៃទី០១ ដល់ថ្ងៃទី០៣ ខែមេសា ឆ្នាំ២០២៦ កម្លាំងជំនាញបានបន្តបើកប្រតិបត្តិការជាបន្តបន្ទាប់ នៅក្នុងភូមិសាស្ត្រស្រុកសំរោងទង និងក្រុងច្បារមន ដោយឈានដល់ការបង្ក្រាប និងឃាត់ខ្លួនជនសង្ស័យជាបន្តបន្ទាប់ រួមមានទាំងមុខសញ្ញាចាស់ និងមុខសញ្ញាថ្មី ដែលជាប់ពាក់ព័ន្ធនឹងសកម្មភាពជួញដូរ និងប្រើប្រាស់គ្រឿងញៀន។

ក្នុងប្រតិបត្តិការនេះ សមត្ថកិច្ចបានដកហូតវត្ថុតាងសំខាន់ៗ រួមមាន ម្សៅក្រាមសង្ស័យជាសារធាតុញៀនចំនួន ២៦កញ្ចប់ ទម្ងន់សរុបប្រហែល ១៤៦.៨០ក្រាម ទូរស័ព្ទចំនួន៧គ្រឿង ម៉ូតូចំនួន២គ្រឿង ជញ្ជីងថ្លឹងគ្រឿងញៀន៣គ្រឿង កាំភ្លើងកែច្នៃ ១ដើម កាំបិតផ្គាក់ ១ ដែកកេះ និងឧបករណ៍ប្រើប្រាស់គ្រឿងញៀនជាច្រើនទៀត ព្រមទាំងសម្ភារៈពាក់ព័ន្ធនឹងការវេចខ្ចប់ និងប្រើប្រាស់គ្រឿងញៀន។

អាវុធហត្ថខេត្តកំពង់ស្ពឺ បានបញ្ជាក់ថា ប្រតិបត្តិការនេះបង្ហាញពីការខិតខំប្រឹងប្រែងយ៉ាងខ្លាំងក្នុងការទប់ស្កាត់ និងបង្ក្រាបបទល្មើសគ្រឿងញៀន ដើម្បីរក្សាសន្តិសុខ សណ្តាប់ធ្នាប់សង្គម និងការពារសុវត្ថិភាពប្រជាពលរដ្ឋ។

បច្ចុប្បន្ន ជនសង្ស័យទាំង៩នាក់ រួមទាំងវត្ថុតាង ត្រូវបានកម្លាំងជំនាញកសាងសំណុំរឿង បញ្ជូនទៅសាលាដំបូងខេត្តកំពង់ស្ពឺ ដើម្បីបន្តនីតិវិធីច្បាប់៕