ឯកឧត្តម ស៊ុន ចាន់ថុល៖ គម្រោងហ្វូណនតេជោ កំណាត់ទី២ ជាសក្ខីភាពនៃសមិទ្ធផលជាតិ និងសាមគ្គីភាពខ្មែរ

(តាកែវ)៖ ឯកឧត្តម ស៊ុន ចាន់ថុល ឧបនាយករដ្ឋមន្ដ្រី និងអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា ពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ ដែលត្រូវបានរៀបចំឡើងយ៉ាងអធិកអធម នាព្រឹកថ្ងៃទី១១ ខែមេសា ឆ្នាំ២០២៦នេះ គឺជាសក្ខីភាពបង្ហាញពីសមិទ្ធផលដ៏វិសេសវិសាលរបស់ប្រជាជាតិខ្មែរ និងការរួមចំណែកយ៉ាងសកម្មរបស់គ្រប់ភាគីពាក់ព័ន្ធ។

ថ្លែងក្នុងពិធីសម្ពោធដែលប្រារព្ធធ្វើឡើងនៅភូមិត្រើយឃ្លោក ឃុំដូងខ្ពស់ ស្រុកបូរីជលសារ ខេត្តតាកែវ ឯកឧត្តមបានលើកឡើងថា គម្រោងនេះមិនត្រឹមតែបង្ហាញពីសមត្ថភាព និងលទ្ធភាពពេញលេញរបស់កម្ពុជានោះទេ ប៉ុន្តែថែមទាំងបង្កប់នូវឆន្ទៈដ៏មុតមាំ និងស្មារតីមហាសាមគ្គីជាតិរបស់រាជរដ្ឋាភិបាល និងប្រជាពលរដ្ឋខ្មែរនៅគ្រប់ទិសទី ដែលបានចូលរួមគាំទ្រ និងជំរុញដំណើរការសាងសង់ឱ្យឈានទៅរកភាពជោគជ័យ។

ឯកឧត្តម ស៊ុន ចាន់ថុល បានបន្ថែមថា គម្រោងគ្រប់គ្រងធនធានទឹកចម្រុះហ្វូណនតេជោនេះ មានតួនាទីសំខាន់ក្នុងការលើកកម្ពស់សេដ្ឋកិច្ច និងសង្គមកម្ពុជា ជាពិសេសក្នុងការគ្រប់គ្រងធនធានទឹក ប្រសើរឡើងនូវវិស័យកសិកម្ម ការពារបរិស្ថាន និងការអភិវឌ្ឍហេដ្ឋារចនាសម្ព័ន្ធដែលទាក់ទង។

ក្នុងឱកាសដ៏មានន័យនេះផងដែរ ឯកឧត្តម ឧបនាយករដ្ឋមន្ដ្រី បានថ្លែងអំណរគុណយ៉ាងជ្រាលជ្រៅចំពោះសហគ្រាសសាធារណៈ និងក្រុមហ៊ុនវិនិយោគក្នុងស្រុក ដែលបានចូលរួមបោះទុនវិនិយោគរួមគ្នាជាមួយក្រុមហ៊ុនវិនិយោគមកពីប្រទេសចិន ក្នុងការអភិវឌ្ឍគម្រោងដ៏សំខាន់នេះ។

ជាមួយគ្នានេះ ឯកឧត្តមក៏បានថ្លែងអំណរគុណចំពោះរដ្ឋាភិបាលនៃសាធារណរដ្ឋប្រជាមានិតចិន តាមរយៈឯកឧត្តម ឯកអគ្គរដ្ឋទូត វ៉ាង វិនពីន ដែលបានផ្តល់ការគាំទ្រយ៉ាងសកម្មដល់ការវិនិយោគរបស់ក្រុមហ៊ុនចិនលើគម្រោងនេះ ព្រមទាំងបានផ្តល់ជំនួយឥតសំណងសម្រាប់សាងសង់ស្ពាន និងហេដ្ឋារចនាសម្ព័ន្ធតាមបណ្តោយគម្រោងផងដែរ។

ឯកឧត្តម ស៊ុន ចាន់ថុល បានគូសបញ្ជាក់បន្ថែមថា ប្រទេសចិនជាដៃគូអភិវឌ្ឍដ៏សំខាន់មួយរបស់កម្ពុជា ដែលបានចូលរួមយ៉ាងសកម្មក្នុងការជំរុញការអភិវឌ្ឍលើគ្រប់វិស័យ។ តាមរយៈក្របខណ្ឌកិច្ចសហប្រតិបត្តិការត្បូងពេជ្រ កម្ពុជា-ចិន បានបន្តពង្រឹង និងពង្រីកកិច្ចសហប្រតិបត្តិការទ្វេភាគីលើវិស័យនយោបាយ ពាណិជ្ជកម្ម វិនិយោគ ការពារជាតិ សន្តិសុខ ការផ្លាស់ប្តូរប្រជាជន និងវប្បធម៌ ព្រមទាំងការអភិវឌ្ឍហេដ្ឋារចនាសម្ព័ន្ធសំខាន់ៗ ដូចជា ប្រព័ន្ធដឹកជញ្ជូន បណ្តាញថាមពល ខ្សែកាបអុបទិក និងប្រព័ន្ធភស្តុភារកម្ម។

គម្រោងគ្រប់គ្រងធនធានទឹកចម្រុះហ្វូណនតេជោ ត្រូវបានរំពឹងថា នឹងក្លាយជាមូលដ្ឋានសំខាន់មួយក្នុងការគាំទ្រការអភិវឌ្ឍសេដ្ឋកិច្ចជាតិ និងលើកកម្ពស់គុណភាពជីវភាពរស់នៅរបស់ប្រជាពលរដ្ឋកម្ពុជា នៅអនាគតយ៉ាងចីរភាព៕