ឧត្តមសេនីយ៍ត្រី ម៉េង ស៊្រុន ថ្លែងអំណរគុណដ៏ជ្រាលជ្រៅ ខណៈក្រុមហ៊ុនចំការកៅស៊ូបឹងកេត ឧបត្ថម្ភចេកអំបូងលឿង៣០០កេះ អបអរឆ្នាំថ្មីខ្មែរ

(កំពង់ស្ពឺ)៖ បញ្ជាការដ្ឋានកងរាជអាវុធហត្ថខេត្តកំពង់ស្ពឺ កាលពីព្រឹកថ្ងៃទី១០ ខែមេសា ឆ្នាំ២០២៦ បានទទួលអំណោយជាចេកអំបូងលឿងចំនួន៣០០កេះ ពីឯកឧត្តម ហេង ស្រេង អគ្គនាយកក្រុមហ៊ុនចំការកៅស៊ូបឹងកេត និងលោកជំទាវ អ៊ុង ម៉ានិត ក្នុងឱកាសអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានមកដល់ក្នុងពេលខាងមុខនេះ។

អំណោយដ៏មានន័យនេះ ត្រូវបានលោកឧត្តមសេនីយ៍ត្រី ម៉េង ស៊្រុន មេបញ្ជាការកងរាជអាវុធហត្ថខេត្តកំពង់ស្ពឺចាត់តាំងឲ្យក្រុមការងារជាតំណាង រៀបចំពិធីទទួលយ៉ាងកក់ក្តៅ និងសមរម្យ ដោយបង្ហាញពីការសហការល្អរវាងវិស័យឯកជន និងអង្គភាពអនុវត្តច្បាប់ក្នុងមូលដ្ឋាន។

គួររំលឹកថា ឯកឧត្តម ហេង ស្រេង និងលោកជំទាវ អ៊ុង ម៉ានិត តែងតែបន្តការគាំទ្រ និងឧបត្ថម្ភដល់បញ្ជាការដ្ឋានកងរាជអាវុធហត្ថខេត្តកំពង់ស្ពឺជាបន្តបន្ទាប់។ ជាពិសេស ការឧបត្ថម្ភលើកនេះ ជាផលិតផលកសិកម្មខ្មែរ មានគុណភាពខ្ពស់ ដែលមិនត្រឹមតែផ្គត់ផ្គង់តម្រូវការក្នុងស្រុកប៉ុណ្ណោះទេ ប៉ុន្តែថែមទាំងជាផលិតផលនាំចេញទៅកាន់ទីផ្សារអន្តរជាតិផងដែរ ដែលបង្ហាញពីសក្តានុពលវិស័យកសិកម្មជាតិ។

ក្នុងឱកាសនេះផងដែរ តាមរយៈក្រុមការងារតំណាង លោកឧត្តមសេនីយ៍ត្រី ម៉េង ស៊្រុន បានថ្លែងអំណរគុណយ៉ាងជ្រាលជ្រៅចំពោះឯកឧត្តម ហេង ស្រេង និងលោកជំទាវ អ៊ុង ម៉ានិត ដែលបានចូលរួមចំណែកយ៉ាងសកម្មក្នុងការគាំទ្រដល់អង្គភាពអាវុធហត្ថខេត្តកំពង់ស្ពឺ ជាពិសេសក្នុងឱកាសបុណ្យប្រពៃណីជាតិដ៏មានសារៈសំខាន់នេះ។

លោកឧត្តមសេនីយ៍ត្រី ម៉េង ស៊្រុន ក៏បានសម្តែងនូវការកោតសរសើរខ្ពស់ចំពោះចិត្តសប្បុរសធម៌ និងការចូលរួមទំនួលខុសត្រូវសង្គមរបស់ក្រុមហ៊ុន ដែលជាគំរូល្អក្នុងការចូលរួមអភិវឌ្ឍសង្គម និងលើកកម្ពស់សាមគ្គីភាពជាតិ។

ជាមួយគ្នានេះ លោកក៏បានបញ្ជាក់ថា អំណោយទាំងនេះ នឹងត្រូវប្រើប្រាស់យ៉ាងមានប្រសិទ្ធភាព ដើម្បីលើកទឹកចិត្តដល់កងកម្លាំងអាវុធហត្ថ ដែលកំពុងបំពេញភារកិច្ចការពារសន្តិសុខ សណ្តាប់ធ្នាប់ និងសុវត្ថិភាពសង្គមជូនប្រជាពលរដ្ឋ។

លោកឧត្តមសេនីយ៍ត្រី ម៉េង ស៊្រុន បានប្រសិទ្ធពរជ័យជូនឯកឧត្តម ហេង ស្រេង លោកជំទាវ អ៊ុង ម៉ានិត និងក្រុមគ្រួសារ ព្រមទាំងបុគ្គលិកក្រុមហ៊ុនទាំងអស់ សូមទទួលបានសុខភាពល្អ បរិបូរណ៍ អាយុយឺនយូរ កម្លាំងមាំមួន ប្រាជ្ញាឈ្លាសវៃ និងជោគជ័យគ្រប់ភារកិច្ច ក្រោមបរិយាកាសសិរីសួស្តី នៃពិធីបុណ្យចូលឆ្នាំថ្មីប្រពៃណីជាតិខ្មែរ៕