សម្ដេចធិបតី ហ៊ុន ម៉ាណែត អញ្ជើញបើកការដ្ឋានគម្រោងប្រវត្តិសាស្ត្រ «ហ្វូណនតេជោ» កំណាត់ទី២ ពង្រីកសក្តានុពលដឹកជញ្ជូនផ្លូវទឹកជាតិ

(ភ្នំពេញ)៖ នាព្រឹកថ្ងៃទី១១ ខែមេសា ឆ្នាំ២០២៦នេះ សម្ដេចមហាបវរធិបតី ហ៊ុន​ ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីបើកការដ្ឋានសាងសង់ «គម្រោងគ្រប់គ្រងធនធានទឹកចម្រុះហ្វូណនតេជោ» កំណាត់ទី២ ដែលជាគម្រោងមានសារៈសំខាន់យុទ្ធសាស្ត្រសម្រាប់ការអភិវឌ្ឍន៍វិស័យដឹកជញ្ជូនផ្លូវទឹក និងសេដ្ឋកិច្ចជាតិ។

គម្រោងនេះ មានប្រវែងសរុបប្រមាណ ១៥១.៦ គីឡូម៉ែត្រ ចាប់ពីព្រែកពោធិ៍ ខេត្តកណ្ដាល រហូតដល់សមុទ្រ ខេត្តកែប ជាផ្នែកមួយនៃគម្រោងធំសរុបប្រវែង ១៧២.៦ គីឡូម៉ែត្រ ដែលត្រូវបានបែងចែកជា ២កំណាត់ ដោយកំណាត់ទី១ មានប្រវែង ២១ គីឡូម៉ែត្រ។ គម្រោងនេះត្រូវបានចាត់ទុកថា ជាគម្រោងប្រវត្តិសាស្ត្រលើកដំបូងក្នុងវិស័យដឹកជញ្ជូនផ្លូវទឹករបស់កម្ពុជា ដែលមានគោលដៅតភ្ជាប់ប្រព័ន្ធទន្លេមេគង្គទៅកាន់ផ្លូវសមុទ្រ ដើម្បីបង្កើនប្រសិទ្ធភាពនៃការដឹកជញ្ជូន និងពង្រីកពាណិជ្ជកម្មជាតិ។

តាមការសិក្សាបច្ចេកទេស ផ្លូវទឹកកំណាត់ទី២នេះ នឹងឆ្លងកាត់ខេត្តចំនួន៤ រួមមាន ខេត្តកណ្ដាល តាកែវ កំពត និងខេត្តកែប ដោយមានជម្រៅទឹកប្រមាណ ៤.៧ ម៉ែត្រ ទទឹង ៦០ ម៉ែត្រ និងមានគន្លងនាវាចរណ៍ចំនួន ២ អាចអនុញ្ញាតឲ្យនាវាចេញចូល និងចៀសគ្នាបានដោយសុវត្ថិភាព។ គម្រោងនេះ អាចទទួលនាវាមានទំហំផ្ទុកដល់ ៣០០០ DWT នៅរដូវប្រាំង និង ៥០០០ DWT នៅរដូវវស្សា ព្រមទាំងបំពាក់ប្រព័ន្ធបច្ចេកវិទ្យាស្វ័យប្រវត្តិទំនើបសម្រាប់ប្រតិបត្តិការ។

សូមរំលឹកថា គម្រោង «ហ្វូណនតេជោ» ត្រូវបានប្រកាសជាផ្លូវការនៅថ្ងៃទី៥ ខែសីហា ឆ្នាំ២០២៤ ក្រោមការដឹកនាំផ្ទាល់របស់សម្ដេចធិបតី ហ៊ុន ម៉ាណែត ដោយមានការបង្កើតគណៈកម្មាធិការពិសេស និងអនុគណៈកម្មាធិការចំនួន៤ ដើម្បីជំរុញការអនុវត្តគម្រោងឲ្យសម្រេចតាមផែនការ។

ជាមួយគ្នានេះ ក្នុងអំឡុងដំណើរទស្សនកិច្ចផ្លូវការនៅកម្ពុជា របស់ឯកឧត្ដម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន កាលពីខែមេសា ឆ្នាំ២០២៥ ក៏មានការចុះហត្ថលេខាលើកិច្ចព្រមព្រៀង និងកិច្ចសន្យាចំនួន៥ ពាក់ព័ន្ធនឹងគម្រោងនេះ រួមមាន កិច្ចសន្យាភាពជាដៃគូរដ្ឋ-ឯកជន កិច្ចព្រមព្រៀងម្ចាស់ភាគហ៊ុន កិច្ចព្រមព្រៀងវិនិយោគ កិច្ចសន្យាវិស្វកម្ម និងសាងសង់ និងកិច្ចសន្យាប្រតិបត្តិការ-ថែទាំ។

គម្រោងនេះ មានទុនវិនិយោគប្រមាណ ១.១៧ ពាន់លានដុល្លារអាមេរិក ហើយគ្រោងអនុវត្តសាងសង់ក្នុងរយៈពេល ៣៦ខែ ដោយរំពឹងថានឹងបញ្ចប់នៅឆ្នាំ២០២៨។ គម្រោង «ហ្វូណនតេជោ» ត្រូវបានរំពឹងថា នឹងក្លាយជាមូលដ្ឋានសំខាន់មួយក្នុងការជំរុញកំណើនសេដ្ឋកិច្ច កាត់បន្ថយចំណាយដឹកជញ្ជូន និងបង្កើនសមត្ថភាពប្រកួតប្រជែងរបស់កម្ពុជា នៅលើឆាកអន្តរជាតិ៕