មហានក្ខត្តឫក្សឆ្នាំថ្មី! មេបញ្ជាការខេត្តកំពង់ស្ពឺអញ្ជើញជួបសំណេះសំណាល និងជូនពរ ឯកឧត្តម សៅ សុខា
(កំពង់ស្ពឺ)៖ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ នៅថ្ងៃទី៨ ខែមេសា ឆ្នាំ២០២៦ បានអញ្ជើញចូលជួបសម្តែងការគួរសម សំណេះសំណាល សួរសុខទុក្ខ និងជូនពរជ័យសិរីមង្គលដល់ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលកំពុងខិតជិតមកដល់។
ជំនួបនេះ បានប្រព្រឹត្តទៅក្នុងបរិយាកាសកក់ក្ដៅ ស្និទ្ធស្នាល និងពោរពេញដោយការគោរព ដោយលោកឧត្តមសេនីយ៍ត្រី ម៉េង ស្រ៊ុន បានសម្តែងនូវការគោរព និងសរសើរចំពោះការដឹកនាំដ៏ម៉ឺងម៉ាត់ និងមានប្រសិទ្ធភាពរបស់ ឯកឧត្តម នាយឧត្តមសេនីយ៍ សៅ សុខា ក្នុងការអភិវឌ្ឍន៍ និងពង្រឹងសមត្ថភាពកងកម្លាំងអាវុធហត្ថឱ្យកាន់តែរឹងមាំ។
ឆ្លៀតក្នុងឱកាសដ៏មហានក្ខត្តឫក្សនៃពិធីបុណ្យចូលឆ្នាំថ្មីនេះ លោកឧត្តមសេនីយ៍ត្រី ម៉េង ស្រ៊ុន រួមជាមួយនាយទាហាន នាយទាហានរង និងពលទាហាន នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ បានបួងសួងដល់ព្រះរតនត្រ័យ និងវត្ថុស័ក្តិសិទ្ធិទាំងឡាយ សូមប្រទានពរជ័យសិរីមង្គល វិបុលសុខ ជូនដល់ ឯកឧត្តម នាយឧត្តមសេនីយ៍ សៅ សុខា និងលោកជំទាវ ព្រមទាំងបុត្រា បុត្រី ចៅប្រុស ចៅស្រី និងក្រុមគ្រួសារទាំងមូល ឱ្យទទួលបានពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីខាន។
ជាពិសេស សូមឱ្យ ឯកឧត្តម នាយឧត្តមសេនីយ៍ សៅ សុខា មានសុខភាពល្អបរិបូរណ៍ កម្លាំងមាំមួន បញ្ញាញាណវាងវៃ និងអាយុយឺនយូរ ដើម្បីបន្តដឹកនាំ និងបំពេញភារកិច្ចបម្រើជាតិ និងប្រជាជន ឱ្យទទួលបានជោគជ័យកាន់តែខ្ពស់ និងរីកចម្រើនរុងរឿងជានិច្ចនិរន្តរ៍៕
