ក្រុមការងារចល័តក្រសួងសាធារណការចុះបង្ក្រាបរថយន្តដឹកលើសទម្ងន់លើផ្លូវជាតិលេខ៥ ព្រមានអនុវត្តច្បាប់តឹងរ៉ឹងគ្មានលើកលែង

(ពោធិ៍សាត់)៖ ក្រោមការចង្អុលបង្ហាញពី ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន លោក សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានដឹកនាំក្រុមការងារចល័តចម្រុះ ចុះអនុវត្តប្រតិបត្តិការត្រួតពិនិត្យយានយន្តដឹកជញ្ជូនលើសទម្ងន់ នៅលើផ្លូវជាតិលេខ៥ ត្រង់គីឡូម៉ែត្រលេខ១៨៦ ស្ថិតក្នុងស្រុកបាកាន ខេត្តពោធិ៍សាត់ នាថ្ងៃទី១០ ខែមេសា ឆ្នាំ២០២៦។

ប្រតិបត្តិការនេះ មានការសហការពីមន្រ្តីស្ថានីយឃ្លាំងមឿង និងក្រុមការងារពាក់ព័ន្ធ ដោយផ្តោតលើការពិនិត្យយានយន្តធុនធ្ងន់ដែលអាចបង្កផលប៉ះពាល់ដល់ហេដ្ឋារចនាសម្ព័ន្ធផ្លូវថ្នល់ និងសុវត្ថិភាពចរាចរណ៍។

ជាលទ្ធផល ក្រុមការងារបានត្រួតពិនិត្យឃើញយានយន្តចំនួន ២គ្រឿង ដែលមានសញ្ញាឡូហ្គូអក្សរ “K” និង “SL” ដឹកទំនិញលើសទម្ងន់អនុញ្ញាតយ៉ាងច្បាស់ ដោយមានទម្ងន់សរុបចន្លោះពី ៧៥ តោន ដល់ ៩២ តោន ខណៈកម្រិតអនុញ្ញាតត្រូវបានលើសចន្លោះពី ៣០ តោន ដល់ ៤៧ តោន ស្មើនឹងប្រហែលពី ៦៦% ដល់ ១០៤%។

ក្រសួងសាធារណការ និងដឹកជញ្ជូន បានធ្វើការក្រើនរំលឹកយ៉ាងតឹងរ៉ឹងដល់ម្ចាស់ក្រុមហ៊ុនដឹកជញ្ជូនធុនធ្ងន់ ម្ចាស់យានយន្ត និងអ្នកបើកបរ ទាំងអស់ ឱ្យគោរពតាមច្បាប់ និងអនុវត្តតាមតម្រាយផ្លូវអនុញ្ញាតសម្រាប់យានយន្តចាប់ពីភ្លៅ៦ឡើងទៅ ដូចដែលក្រសួងបានកំណត់។

ជាមួយគ្នានេះ ក្រុមការងារចល័តពិសេស នឹងបន្តចុះឆ្មក់ត្រួតពិនិត្យយានយន្តដឹកលើសទម្ងន់នៅទូទាំងប្រទេស ដោយអនុវត្តវិធានការច្បាប់យ៉ាងតឹងរ៉ឹង ដើម្បីទប់ស្កាត់បទល្មើស និងថែរក្សាគុណភាពហេដ្ឋារចនាសម្ព័ន្ធផ្លូវថ្នល់ជាតិ ដោយគ្មានការលើកលែងឡើយ៕