អភិបាលខេត្តកណ្ដាលណែនាំមន្ទីរជុំវិញខេត្ត បង្កើនប្រសិទ្ធភាពសេវាសាធារណៈ បម្រើប្រជាពលរដ្ឋឱ្យកាន់តែល្អប្រសើរ

(កណ្ដាល)៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានណែនាំឱ្យមន្ទីរ-អង្គភាពជុំវិញខេត្ត បន្តលើកកម្ពស់តួនាទី និងភារកិច្ចរបស់ខ្លួន ក្នុងការផ្តល់សេវាសាធារណៈជូនប្រជាពលរដ្ឋ ឱ្យបានល្អប្រសើរនៅតាមមូលដ្ឋាន ដែលជាតម្រូវការចាំបាច់ប្រចាំថ្ងៃរបស់ប្រជាពលរដ្ឋ។

ការណែនាំនេះ ត្រូវបានលើកឡើងក្នុងឱកាស ឯកឧត្តមអភិបាលខេត្ត អញ្ជើញជាអធិបតីរួមជាមួយ ឯកឧត្តម នូ សាខន ប្រធានក្រុមប្រឹក្សាខេត្តកណ្ដាល ក្នុងកិច្ចប្រជុំសាមញ្ញលើកទី២៣ របស់ក្រុមប្រឹក្សាខេត្ត អាណត្តិទី៤ នាថ្ងៃទី៨ ខែមេសា ឆ្នាំ២០២៦ ដោយមានការចូលរួមពីសមាជិកក្រុមប្រឹក្សាខេត្ត អភិបាលរងខេត្ត មន្ទីរ-អង្គភាពជុំវិញខេត្ត និងមន្ត្រីពាក់ព័ន្ធជាច្រើនរូប។

ក្នុងកិច្ចប្រជុំនេះ ឯកឧត្តម នូ សាខន បានថ្លែងកោតសរសើរចំពោះគណៈកម្មាធិការសម្រាប់ស្ត្រី និងកុមារខេត្ត ដែលបានចូលរួមយ៉ាងសកម្មក្នុងការងារសេវាសង្គម ជាពិសេសផ្នែកគាំពារសង្គម ដែលជាកត្តាសំខាន់ក្នុងការលើកកម្ពស់សុវត្ថិភាព និងសុខុមាលភាពប្រជាពលរដ្ឋ។ ទន្ទឹមនឹងនេះ ឯកឧត្តមក៏បានស្នើឱ្យមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បន្តពង្រឹងកិច្ចសហការជាមួយគណៈកម្មាធិការខាងលើ ឱ្យកាន់តែប្រសើរឡើង។

ជាមួយគ្នានេះផងដែរ ឯកឧត្តមប្រធានក្រុមប្រឹក្សាខេត្ត បានថ្លែងអំណរគុណចំពោះការសហការល្អរបស់គណៈកម្មាធិការសម្រាប់ស្ត្រី និងកុមារខេត្ត ជាមួយអាជ្ញាធរ និងមន្ទីរ-អង្គភាពជំនាញ ក្នុងការចុះតាមដាន និងដោះស្រាយបញ្ហាប្រឈមជាក់ស្តែង ដូចជា ករណីជម្ងឺរមាស់នៅភូមិអង្គរជ័យ ឃុំបន្ទាយដែក ស្រុកកៀនស្វាយ និងករណីផ្សេងៗទៀត ដើម្បីធានាការពារសិទ្ធិ និងសុវត្ថិភាពស្ត្រី យុវវ័យ និងកុមារ។

ឯកឧត្តម គួច ចំរើន ក៏បានជំរុញឱ្យមន្ទីរ-អង្គភាពទាំងអស់ បន្តរួមគ្នាខិតខំដោះស្រាយសំណើ សំណូមពរ និងបញ្ហាប្រឈមនានារបស់ប្រជាពលរដ្ឋ នៅតាមមូលដ្ឋាន ដោយគោរពតាមគោលការណ៍តម្លាភាព គណនេយ្យភាព និងយុត្តិធម៌។ ចំពោះបញ្ហាណាដែលហួសសមត្ថភាព ត្រូវរាយការណ៍ជូនរដ្ឋបាលខេត្ត ដើម្បីធ្វើការដោះស្រាយឆាប់រហ័ស និងមានប្រសិទ្ធភាព។

គួរបញ្ជាក់ផងដែរថា ក្នុងកិច្ចប្រជុំនេះ ក្រុមប្រឹក្សាខេត្តកណ្ដាល បានពិនិត្យ ពិភាក្សា អនុម័ត និងផ្សព្វផ្សាយលិខិតបទដ្ឋានគតិយុត្តនានា សរុបចំនួន ៩ របៀបវារៈសំខាន់ៗ ដើម្បីបន្តលើកកម្ពស់ប្រសិទ្ធភាពការគ្រប់គ្រង និងអភិវឌ្ឍន៍ខេត្តឱ្យកាន់តែរីកចម្រើន៕