មន្ទីរអភិវឌ្ឍន៍ជនបទខេត្តកណ្តាលរៀបចំពិធីសូត្រមន្តអបអរសាទរចូលឆ្នាំខ្មែរ បង្កើនសាមគ្គីភាព និងសិរីមង្គល

(កណ្តាល)៖ ក្នុងបរិយាកាសអធិកអធម ពោរពេញដោយសេចក្តីជឿជាក់ និងសុភមង្គល នាព្រឹកថ្ងៃទី៩ ខែមេសា ឆ្នាំ២០២៦ មន្ទីរអភិវឌ្ឍន៍ជនបទខេត្តកណ្តាល បានរៀបចំពិធីសូត្រមន្តលើករាសី អបអរសាទរ ពិធីបុណ្យចូលឆ្នាំប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ គ.ស.២០២៦ ក្រោមការដឹកនាំរបស់លោកស្រី ជី ថាវី ប្រធានមន្ទីរ។

ពិធីនេះមានការចូលរួមយ៉ាងសកម្មពីថ្នាក់ដឹកនាំ មន្ត្រីរាជការ មន្ត្រីជាប់កិច្ចសន្យា និងមន្ត្រីចូលនិវត្តន៍សរុបចំនួន ៦៥នាក់ ក្នុងនោះមានមន្ត្រីចូលនិវត្តន៍ ១៥នាក់ផងដែរ។ កម្មវិធីត្រូវបានរៀបចំតាមបែបបទប្រពៃណីខ្មែរ និងព្រះពុទ្ធសាសនា ដើម្បីបួងសួងសុំសិរីសួស្តី ជ័យមង្គល និងសុខសុភមង្គល សម្រាប់ឆ្នាំថ្មីដែលកំពុងចូលមក។

ក្រៅពីពិធីសូត្រមន្ត អង្គភាពក៏បានរៀបចំអាហារសាមគ្គី និងលេងល្បែងប្រជាប្រិយខ្មែរ បង្កើនភាពរីករាយ ក្តីស្រឡាញ់ និងការរឹតបន្តឹងសាមគ្គីភាពរវាងមន្ត្រីកំពុងបំពេញភារកិច្ច និងមន្ត្រីចូលនិវត្តន៍ ឲ្យកាន់តែជិតស្និទ្ធ និងមានភក្តីភាពខ្ពស់។

ក្នុងឱកាសដ៏មានន័យនេះផងដែរ លោកស្រីប្រធានមន្ទីរ បានបង្ហាញពីការយកចិត្តទុកដាក់ ដោយបានឧបត្ថម្ភថវិកាលើកទឹកចិត្ត និងប្រេងសាំង ជូនដល់មន្ត្រីរាជការ និងមន្ត្រីចូលនិវត្តន៍គ្រប់ៗគ្នា ដែលជាការលើកទឹកចិត្ត និងបង្ហាញពីការថែរក្សាទំនាក់ទំនងល្អក្នុងអង្គភាព។

ជាមួយគ្នានេះ មន្ត្រីទាំងអស់បានបួងសួងដល់ទេវតាឆ្នាំថ្មី ឆ្នាំមមី អដ្ឋស័ក ព្រះនាម «រាក្យសាទេវី» សូមប្រោះព្រំសព្ទសារធុការពរជ័យ សិរីសួស្តី ជ័យមង្គល ដល់ថ្នាក់ដឹកនាំ និងមន្ត្រីរាជការទាំងអស់ ព្រមទាំងមន្ត្រីចូលនិវត្តន៍ សូមទទួលបានពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ពិធីនេះមិនត្រឹមតែជាការរក្សាប្រពៃណីបុរាណប៉ុណ្ណោះទេ ប៉ុន្តែថែមទាំងជាការបង្កើនសាមគ្គីភាព ការគោរពគ្នា និងជំរុញទឹកចិត្តក្នុងការបំពេញភារកិច្ច ដើម្បីអភិវឌ្ឍសង្គមឲ្យកាន់តែរីកចម្រើនផងដែរ៕