ឧត្តមសេនីយ៍ត្រី ឡាក់ ម៉េងធី អញ្ជើញចូលរួមកិច្ចប្រជុំពិភាក្សាពាក់ព័ន្ធវិស័យល្បែងពាណិជ្ជកម្ម នៅខេត្តកណ្តាល ដើម្បីពង្រឹងការគ្រប់គ្រង និងអភិវឌ្ឍន៍មានប្រសិទ្ធភាព

(កណ្ដាល)៖ នៅរសៀលថ្ងៃពុធ ទី៨ ខែមេសា ឆ្នាំ២០២៦ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានចាត់តាំងលោកឧត្តមសេនីយ៍ត្រី ឡាក់ ម៉េងធី ស្នងការរង ជាតំណាង ចូលរួមកិច្ចប្រជុំជួបសម្ដែងការគួរសម និងពិភាក្សាការងារពាក់ព័ន្ធនឹងវិស័យល្បែងពាណិជ្ជកម្មនៅក្នុងមូលដ្ឋានខេត្តកណ្តាល។

កិច្ចប្រជុំខាងលើនេះ ត្រូវបានរៀបចំឡើងក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត យ៉េត វីណែល អគ្គលេខាធិការ គណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក) និងឯកឧត្តម គួច ចំរើន អភិបាល នៃគណៈអភិបាលខេត្តកណ្តាល នៅសាលប្រជុំសាលាខេត្តកណ្តាល។

កិច្ចប្រជុំនេះមានគោលបំណងសំខាន់ក្នុងការពិភាក្សា និងផ្លាស់ប្តូរយោបល់អំពីការគ្រប់គ្រងវិស័យល្បែងពាណិជ្ជកម្ម ឲ្យមានភាពប្រសើរឡើង ស្របតាមច្បាប់ និងបទប្បញ្ញត្តិជាធរមាន ព្រមទាំងពង្រឹងសន្តិសុខ សុវត្ថិភាព និងសណ្តាប់ធ្នាប់សាធារណៈនៅក្នុងមូលដ្ឋាន។

តាមរយៈកិច្ចប្រជុំនេះផងដែរ ភាគីពាក់ព័ន្ធទាំងអស់បានបង្ហាញពីការប្តេជ្ញាចិត្តក្នុងការសហការយ៉ាងជិតស្និទ្ធ ដើម្បីធានាឲ្យវិស័យល្បែងពាណិជ្ជកម្មដំណើរការយ៉ាងមានតម្លាភាព ប្រកបដោយប្រសិទ្ធភាព និងចូលរួមចំណែកក្នុងការអភិវឌ្ឍសេដ្ឋកិច្ចមូលដ្ឋាន៕