ប្តីវាយសម្លាប់ប្រពន្ធខ្លួនឯង ដោយសារទំនាស់ពាក្យសម្ដី ត្រូវសមត្ថកិច្ចឡោមព័ទ្ធចាប់ខ្លួនបានភ្លាមៗ

(ស្វាយរៀង)៖ សមត្ថកិច្ចនគរបាលស្រុកស្វាយជ្រំ បានចុះបង្ក្រាប និងឃាត់ខ្លួនជនសង្ស័យម្នាក់បានដោយជោគជ័យ បន្ទាប់ពីបានប្រព្រឹត្តអំពើឃាតកម្មយ៉ាងសាហាវលើប្រពន្ធខ្លួនឯង ដោយសារទំនាស់ពាក្យសម្ដី។

លោកវរសេនីយ៍ឯក សោម សុភ័ណ្ឌ អធិការនគរបាលស្រុកស្វាយជ្រំ បានឲ្យដឹងថា ករណីនេះកើតឡើងនៅរសៀលថ្ងៃទី៧ ខែមេសា ឆ្នាំ២០២៦ វេលាម៉ោង ១៥៖៥៥នាទី ស្ថិតនៅភូមិតារាក់ ឃុំឈើទាល ស្រុកស្វាយជ្រំ ខេត្តស្វាយរៀង បន្ទាប់ពីកម្លាំងប៉ុស្តិ៍នគរបាលរដ្ឋបាលឈើទាល ទទួលបានព័ត៌មានពីប្រជាពលរដ្ឋថា មានករណីប្តីវាយប្រពន្ធរហូតដល់ស្លាប់។

ក្រោយទទួលព័ត៌មាន និងអនុវត្តតាមបទបញ្ជាដ៏ម៉ឺងម៉ាត់ពីលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្ត ព្រមទាំងមានការសម្របសម្រួលនីតិវិធីពីលោក ខាំ សុផារី ព្រះរាជអាជ្ញា នៃអយ្យការអមសាលាដំបូងខេត្ត កម្លាំងជំនាញស្រុក ដឹកនាំដោយលោកអធិការ បានសហការជាមួយកម្លាំងកងរាជអាវុធហត្ថស្រុក និងអាជ្ញាធរពាក់ព័ន្ធ ចុះឡោមព័ទ្ធ និងឃាត់ខ្លួនជនសង្ស័យបានភ្លាមៗ។

ជនសង្ស័យមានឈ្មោះ ផេង សារ៉ុន ភេទប្រុស អាយុ ៦៣ឆ្នាំ ត្រូវបានសមត្ថកិច្ចឃាត់ខ្លួន បន្ទាប់ពីបានប្រើដំបងឬស្សីវាយលើប្រពន្ធឈ្មោះ កង សាមឿន អាយុ ៦៨ឆ្នាំ បណ្តាលឲ្យស្លាប់នៅកន្លែងកើតហេតុ។

ក្នុងប្រតិបត្តិការចាប់ខ្លួន ជនសង្ស័យបានបង្ហាញអាកប្បកិរិយាមិនសហការ ដោយកាន់ចបជីក និងជំពាមកៅស៊ូបាញ់ ព្រមទាំងព្យាយាមវាយតដៃមកលើសមត្ថកិច្ច ប៉ុន្តែត្រូវបានកម្លាំងឡោមព័ទ្ធបង្ក្រាបបានដោយសុវត្ថិភាព។

នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានវាយប្រពន្ធរហូតដល់ស្លាប់មែន ដោយមូលហេតុបណ្តាលមកពីមានទំនាស់ពាក្យសម្ដីជាមួយគ្នា។

សមត្ថកិច្ចជំនាញ និងក្រុមគ្រូពេទ្យ បានចុះពិនិត្យ និងធ្វើកោសល្យវិច័យសាកសព រកឃើញថា ជនរងគ្រោះមានស្នាមរបួសធ្ងន់នៅតំបន់ក្បាល បណ្តាលឲ្យផុងប្រេះលលាក្បាល ដែលជាមូលហេតុនាំឲ្យស្លាប់។

វត្ថុតាងដែលត្រូវបានដកហូតរួមមាន ចបជីក ១, ដំបងឬស្សី ១, ជំពាមកៅស៊ូ ១, គ្រាប់ថ្មគ្រួស ៤គ្រាប់ និងគ្រាប់ខ្លីដី ២គ្រាប់។

បច្ចុប្បន្ន ជនសង្ស័យ រួមទាំងវត្ថុតាង ត្រូវបានសមត្ថកិច្ចជំនាញកំពុងកសាងសំណុំរឿង ដើម្បីបញ្ជូនទៅតុលាការ ចាត់ការតាមនីតិវិធីច្បាប់ ខណៈសាកសពជនរងគ្រោះ ត្រូវបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕