អភិបាលក្រុងតាខ្មៅដឹកនាំប្រតិបត្តិការយ៉ាងម៉ឺងម៉ាត់ ប្រមូលជនអនាថា ពាក់ព័ន្ធគ្រឿងញៀន ដើម្បីពង្រឹងសុវត្ថិភាពសង្គម មុនពិធីបុណ្យចូលឆ្នាំខ្មែរ

(កណ្ដាល)៖ អាជ្ញាធរក្រុងតាខ្មៅបានបង្ហាញពីភាពសកម្ម និងការទទួលខុសត្រូវខ្ពស់ ក្នុងការពង្រឹងសន្តិសុខ សណ្ដាប់ធ្នាប់សាធារណៈ ដោយអនុវត្តយ៉ាងម៉ឺងម៉ាត់តាមការណែនាំរបស់ ឯកឧត្តម គួច ចំរើន អភិបាល នៃគណៈភិបាលខេត្តកណ្ដាល និងជាប្រធានគណៈបញ្ជាការឯកភាពរដ្ឋបាលខេត្ត។

នៅព្រឹកថ្ងៃទី០៧ ខែមេសា ឆ្នាំ២០២៦ កម្លាំងចម្រុះក្រោមការដឹកនាំផ្ទាល់របស់លោក ឃឹម សំភារ អភិបាលក្រុងតាខ្មៅ បានសហការជាមួយការិយាល័យប្រឆាំងគ្រឿងញៀនខេត្ត អាជ្ញាធរសង្កាត់ និងកម្លាំងនគរបាលប៉ុស្តិ៍ ចុះអនុវត្តប្រតិបត្តិការប្រមូលជនអនាថា ដែលបង្កការរអាក់រអួល និងអសន្តិសុខនៅតាមទីសាធារណៈ ក្នុងភូមិសាស្ត្រក្រុងតាខ្មៅ។

ជាលទ្ធផល ប្រតិបត្តិការនេះ បានប្រមូលជនអនាថាសរុបចំនួន៣៤នាក់ ក្នុងនោះស្ត្រី ០១នាក់ ដើម្បីធានាបាននូវសណ្ដាប់ធ្នាប់ សុវត្ថិភាព និងបរិយាកាសល្អសម្រាប់ប្រជាពលរដ្ឋ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលកំពុងខិតជិតមកដល់។

បន្ទាប់ពីបាននាំមកពិនិត្យ និងធ្វើតេស្តទឹកនោមរកសារធាតុញៀន លទ្ធផលបង្ហាញថា មានអ្នកវិជ្ជមានចំនួន ២៣នាក់ (ស្ត្រី ០១នាក់) ខណៈដែលអ្នកអវិជ្ជមានមានចំនួន ១១នាក់។ ចំពោះអ្នកដែលគ្មានសារធាតុញៀន ត្រូវបានអប់រំ ធ្វើកិច្ចសន្យា និងអនុញ្ញាតឱ្យត្រឡប់ទៅលំនៅដ្ឋានវិញ។ ចំណែកឯអ្នកដែលមានសារធាតុញៀន ត្រូវបានអប់រំបន្ត និងបញ្ជូនទៅមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀន ស្ថិតនៅស្រុកកណ្ដាលស្ទឹង ខេត្តកណ្ដាល ដើម្បីទទួលការព្យាបាល និងស្ដារសមត្ថភាពវិញ។

គួរបញ្ជាក់ថា ការដឹកនាំរបស់ លោក ឃឹម សំភារ អភិបាលក្រុងតាខ្មៅ បានបង្ហាញពីវិស័យដឹកនាំមានប្រសិទ្ធភាព មានទិសដៅច្បាស់លាស់ និងមានការយកចិត្តទុកដាក់ខ្ពស់ចំពោះសុខុមាលភាពប្រជាពលរដ្ឋ។ វាជាគំរូល្អនៃការគ្រប់គ្រងរដ្ឋបាលមូលដ្ឋាន ដែលមិនត្រឹមតែអនុវត្តច្បាប់យ៉ាងតឹងរឹង ប៉ុន្តែថែមទាំងផ្ដល់ឱកាសដល់ជនរងគ្រោះឱ្យបានស្ដារជីវិតវិញ តាមរយៈការព្យាបាល និងអប់រំជាក់ស្តែង។

សកម្មភាពនេះ បានទទួលការគាំទ្រយ៉ាងទូលំទូលាយពីប្រជាពលរដ្ឋ ដែលបានមើលឃើញពីការខិតខំប្រឹងប្រែងរបស់អាជ្ញាធរ ក្នុងការកសាងសង្គមមានសុវត្ថិភាព ស្អាតស្អំ និងមានរបៀបរៀបរយ៕