បុកតិច តែអស់ច្រើន! ម្ចាស់ឡានអគ្គិសនីម្នាក់ ហួសចិត្តក្រោយជួសជុលជិត ៨,០០០ដុល្លារ

(ភ្នំពេញ)៖ ក្នុងប៉ុន្មានថ្ងៃចុងក្រោយនេះ មហាជនលើបណ្តាញសង្គម Facebook បានផ្ទុះការពិភាក្សាយ៉ាងកក្រើក ពាក់ព័ន្ធនឹងករណីម្ចាស់រថយន្តអគ្គិសនីម្នាក់ បានបង្ហោះសារសម្តែងការហួសចិត្ត ក្រោយជួសជុលរថយន្តរបស់ខ្លួនអស់ប្រាក់ជិត ៨,០០០ដុល្លារ បន្ទាប់ពីបុកបង្គោលភ្លើងខូចផ្នែកខាងមុខ។

យោងតាមការបង្ហោះរបស់ម្ចាស់គណនីឈ្មោះ Try Ramek បានឲ្យដឹងថា ខ្លួនបានទិញរថយន្តអគ្គិសនីម៉ូដែល BYD Seal 05 មួយគ្រឿង តម្លៃប្រមាណ ២០,០០០ដុល្លារ ប៉ុន្តែដោយសារប្រហែសក្នុងពេលចូលចត បានជ្រុលជើងបុកបង្គោលភ្លើង បណ្ដាលឲ្យខូចខាតផ្នែកខាងមុខយ៉ាងខ្លាំង។

ម្ចាស់រថយន្តបានបន្តថា ដំបូងគាត់គិតថា ការខូចខាតអាចចំណាយត្រឹម ៣០០ ទៅ ៤០០ ដុល្លារ ដូចរថយន្តធម្មតា ប៉ុន្តែជាក់ស្តែងវិញ ការជួសជុលនៅក្រុមហ៊ុនបានចំណាយរហូតដល់ ៧,៩១០ដុល្លារ ដែលស្មើជាង ៤០% នៃតម្លៃរថយន្តថ្មី។ ក្នុងនោះ គ្រាន់តែថ្លៃពន្ធ និងថ្លៃពលកម្មក៏មានចំនួនជាង ២,០០០ដុល្លារហើយ។

ក្រោយការបង្ហោះនេះ មហាជនជាច្រើនបានចូលទៅបញ្ចេញមតិយ៉ាងច្រើន ដោយមានទស្សនៈខុសៗគ្នា។ ខ្លះលើកឡើងថា រថយន្តប្រទេសណាក៏ដោយ បើបុកខ្លាំង នឹងត្រូវចំណាយថ្លៃជួសជុលខ្ពស់ដូចគ្នា មិនថាជារថយន្តអាមេរិក ជប៉ុន អឺរ៉ុប ឬចិននោះទេ។ ខណៈមតិផ្សេងទៀតបានណែនាំឲ្យពិនិត្យលម្អិតលើបញ្ជីគ្រឿងខូចខាត ដែលមានចំនួនជាង ៦០មុខ ទើបធ្វើឲ្យតម្លៃជួសជុលឡើងខ្ពស់ដល់កម្រិតនេះ។

យោងតាមម្ចាស់គណនីមួយទៀត ឈ្មោះ Sothea Saing បានពន្យល់ថា រថយន្តអគ្គិសនីជំនាន់ថ្មីៗ ដូចជា BYD Seal 05 ត្រូវបានបំពាក់ដោយប្រព័ន្ធសុវត្ថិភាពឆ្លាតវៃ (ADAS) មាន Sensor និង Radar ជាច្រើននៅផ្នែកខាងមុខ ព្រមទាំងប្រព័ន្ធត្រជាក់សម្រាប់អាគុយ និងម៉ូទ័រ។ ដូច្នេះ ពេលមានការបុកទង្គិច គ្រឿងបន្លាស់អេឡិចត្រូនិចទាំងនេះអាចខូចខាត និងត្រូវប្តូរថ្មី ដែលមានតម្លៃខ្ពស់។

ទោះបីជាករណីនេះកំពុងទទួលការចាប់អារម្មណ៍ខ្លាំងលើបណ្តាញសង្គមក៏ដោយ ក៏មកដល់ថ្ងៃទី៧ ខែមេសា ឆ្នាំ២០២៦ មិនទាន់ឃើញមានការបកស្រាយជាផ្លូវការពីភាគីក្រុមហ៊ុននៅឡើយទេ។

ករណីនេះត្រូវបានមើលឃើញថា ជាសារ​ដាស់តឿនសម្រាប់អ្នកប្រើប្រាស់រថយន្តអគ្គិសនីទំនើបៗ ថា ការទិញរថយន្តមិនមែនគិតតែតម្លៃទិញដំបូងប៉ុណ្ណោះទេ ត្រូវគិតដល់ថ្លៃថែទាំ ការជួសជុល និងហានិភ័យអាចកើតមានផងដែរ។ ជាពិសេស ការទិញធានារ៉ាប់រងគឺជាជម្រើសសំខាន់ ដើម្បីកាត់បន្ថយហានិភ័យផ្នែកហិរញ្ញវត្ថុ នៅពេលមានគ្រោះថ្នាក់ចរាចរណ៍៕