អាវុធហត្ថ៣៦នាក់ ឡោមព័ទ្ធបឹងឈូក បង្ក្រាបករណីគ្រឿងញៀន និងអាវុធខុសច្បាប់

(កណ្តាល)៖ កម្លាំងកងរាជអាវុធហត្ថក្រុងអរិយក្សត្រ សហការជាមួយកម្លាំងពាក់ព័ន្ធ សរុប ៣៦នាក់ បានបើកប្រតិបត្តិការឡោមព័ទ្ធតំបន់បឹងឈូក បង្ក្រាបករណីជួញដូរគ្រឿងញៀន និងប្រើប្រាស់អាវុធខុសច្បាប់ ដោយឃាត់ខ្លួនជនសង្ស័យ ២នាក់ បានសម្រេច។

ប្រតិបត្តិការនេះធ្វើឡើងនៅវេលាម៉ោង ១៣:៣០ នាទី ថ្ងៃទី៣ ខែមីនា ឆ្នាំ២០២៦ នៅចំណុចទួលកំប្លុង ស្រុកខ្សាច់កណ្ដាល។ ជនសង្ស័យបានព្យាយាមរត់គេច និងលាក់ខ្លួនក្នុងបឹង ប៉ុន្តែត្រូវបានកម្លាំងសមត្ថកិច្ចឡោមព័ទ្ធចាប់ខ្លួនបានជោគជ័យ។

វត្ថុតាងដែលដកហូតរួមមាន ថ្នាំញៀន ២កញ្ចប់ កាំភ្លើងខ្លី ១ដើម គ្រាប់កាំភ្លើង ២១គ្រាប់ កាំភ្លើងបាញ់ឆក់ ១ដើម ទូរសព្ទដៃ ៣គ្រឿង ម៉ូតូ ១គ្រឿង និងប្រាក់មួយចំនួន។

តាមការសារភាព ជនសង្ស័យម្នាក់ធ្លាប់មានប្រវត្តិជាប់ពន្ធនាគារពាក់ព័ន្ធគ្រឿងញៀន ហើយក៏បានទទួលស្គាល់ថា ធ្លាប់ប្រើអាវុធបាញ់គំរាមក្នុងហេតុការណ៍មុនផងដែរ។

បច្ចុប្បន្ន ជនសង្ស័យទាំងពីរកំពុងត្រូវបានឃាត់ខ្លួន ដើម្បីចាត់ការបន្តតាមនីតិវិធីច្បាប់៕