លោកជំទាវវេជ្ជបណ្ឌិត យក់ សម្បត្តិ ត្រូវបានតែងតាំងជាប្រធានក្រុមប្រឹក្សាភិបាលមន្ទីរពេទ្យជាតិ តេជោសន្តិភាព អាណត្តិទី២

(ភ្នំពេញ)៖ រាជរដ្ឋាភិបាលកម្ពុជាបានចេញអនុក្រឹត្យស្តីពីការតែងតាំងសមាសភាពក្រុមប្រឹក្សាភិបាលនៃមន្ទីរពេទ្យជាតិ តេជោសន្តិភាព សម្រាប់អាណត្តិទី២ ដើម្បីបន្តពង្រឹងការគ្រប់គ្រង និងលើកកម្ពស់គុណភាពសេវាសុខាភិបាលឱ្យកាន់តែប្រសើរឡើង។

យោងតាមអនុក្រឹត្យនេះ មាត្រា១ បានកំណត់សមាសភាពក្រុមប្រឹក្សាភិបាលថ្មី រួមមាន៖

*១. លោកជំទាវវេជ្ជបណ្ឌិត យក់ សម្បត្តិ តំណាងក្រសួងសុខាភិបាល ជាប្រធាន

*២. លោកបណ្ឌិត ស្រី វុធ តំណាងក្រសួងសេដ្ឋកិច្ច និងហិរញ្ញវត្ថុ ជាសមាជិក

*៣. ឯកឧត្តមវេជ្ជបណ្ឌិត ហុក គឹមចេង តំណាងឥស្សរជនដែលមានជំនាញ និងបទពិសោធផ្នែកវិទ្យាសាស្ត្រសុខាភិបាល ជាសមាជិក

*៤. លោកវេជ្ជបណ្ឌិត សួន សាមិត្ត នាយកមន្ទីរពេទ្យជាតិ តេជោសន្តិភាព ជាសមាជិក

មាត្រា២ នៃអនុក្រឹត្យបានបញ្ជាក់ថា អនុក្រឹត្យលេខ១១៦ អនក្រ.តត ចុះថ្ងៃទី២៧ ខែមករា ឆ្នាំ២០២៣ ដែលពាក់ព័ន្ធនឹងសមាសភាពក្រុមប្រឹក្សាភិបាលមុន ត្រូវបានទុកជានិរាករណ៍។

សម្រាប់មាត្រា៣ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងសុខាភិបាល ព្រមទាំងមន្ត្រី និងស្ថាប័នពាក់ព័ន្ធទាំងអស់ ត្រូវទទួលបន្ទុកអនុវត្តអនុក្រឹត្យនេះតាមភារកិច្ចរៀងៗខ្លួន ចាប់ពីថ្ងៃចុះហត្ថលេខាតទៅ។

អនុក្រឹត្យនេះត្រូវបានចេញនៅរាជធានីភ្នំពេញ ក្នុងខែមករា ឆ្នាំ២០២៦ ក្រោមហត្ថលេខារបស់ប្រមុខរាជរដ្ឋាភិបាល៕