Breaking News៖ ចៅក្រមចេញដីកាឃុំខ្លួន «គ្រូទាយសន្លឹកបៀរ» ម្នាក់ ពាក់ព័ន្ធបទញុះញង់ និងប្រមាថ ប៉ះពាល់សន្តិសុខសង្គម!

(ភ្នំពេញ)៖ ចៅក្រមស៊ើបសួរ នៃសាលាដំបូងរាជធានីភ្នំពេញ លោក យ៉ែម តុលា បានចេញដីកាបង្គាប់ឱ្យឃុំខ្លួនបណ្តោះអាសន្នស្ត្រីម្នាក់ ដែលជាអ្នកលក់ផលិតផលអនឡាញ និងអះអាងខ្លួនជាគ្រូទាយសន្លឹកបៀរ ពាក់ព័ន្ធនឹងបទល្មើសធ្ងន់ធ្ងរដែលអាចប៉ះពាល់ដល់សន្តិសុខសង្គម។

យោងតាមឯកសារផ្លូវការ ជនត្រូវចោទមានឈ្មោះ នី សម្បត្តិ ភេទស្រី កើតឆ្នាំ១៩៨៤ ជនជាតិខ្មែរ សញ្ជាតិខ្មែរ មានទីលំនៅកំណើតនៅខេត្តសៀមរាប ហើយត្រូវបានឃាត់ខ្លួនកាលពីថ្ងៃទី៣ ខែមេសា ឆ្នាំ២០២៦ នៅរាជធានីភ្នំពេញ។

តាមដីកាបញ្ជាក់ថា ជននេះត្រូវបានដាក់ឱ្យស្ថិតក្រោមការស៊ើបសួរ ពាក់ព័ន្ធបទ ញុះញង់បង្កឱ្យមានភាពវិកវរធ្ងន់ធ្ងរដល់សន្តិសុខសង្គម និងបទប្រមាថនគរបាលជាតិ ដែលត្រូវបានប្រព្រឹត្តនៅក្នុងព្រះរាជាណាចក្រកម្ពុជា កាលពីថ្ងៃទី២ ខែមេសា ឆ្នាំ២០២៦ ដោយយោងតាមមាត្រា ៤៩៤, ៤៩៥ និង ៥០២ នៃក្រមព្រហ្មទណ្ឌ។

ក្រោយពិនិត្យលើសំណុំរឿង និងភស្តុតាងពាក់ព័ន្ធ ចៅក្រមស៊ើបសួរ បានសម្រេចចេញដីកាឱ្យឃុំខ្លួនបណ្តោះអាសន្ន និងបញ្ជាឱ្យអាជ្ញាធរមានសមត្ថកិច្ចនាំខ្លួនជនត្រូវចោទទៅឃុំឃាំងនៅពន្ធនាគាររាជធានីភ្នំពេញ (PJ) ដោយអនុវត្តតាមនីតិវិធីច្បាប់យ៉ាងតឹងរឹង។

ជាមួយគ្នានេះ អាជ្ញាធរពន្ធនាគារត្រូវបានបង្គាប់ឱ្យទទួល និងឃុំខ្លួនជននេះ រហូតដល់មានសេចក្តីសម្រេចថ្មី ខណៈកងកម្លាំងសាធារណៈទាំងអស់ ត្រូវសហការអនុវត្តដីកានេះឱ្យមានប្រសិទ្ធភាពខ្ពស់។

ករណីនេះកំពុងស្ថិតក្នុងដំណាក់កាលស៊ើបសួរ ហើយជនត្រូវចោទត្រូវបានចាត់ទុកថា «គ្មានទោស» រហូតដល់មានសាលក្រមស្ថាពរ ពីតុលាការ៕