អភិបាលខេត្តកំពង់ស្ពឺដាក់វិធានការក្តៅ បង្ក្រាបក្មេងទំនើង និងល្បែងស៊ីសង ខិតខំពង្រឹងសន្តិសុខសាធារណៈ

(កំពង់ស្ពឺ)៖ ក្នុងគោលបំណងពង្រឹងសន្តិសុខ សណ្តាប់ធ្នាប់សាធារណៈ និងជំរុញការអភិវឌ្ឍឱ្យកាន់តែប្រសើរឡើង រដ្ឋបាលខេត្តកំពង់ស្ពឺ ក្រោមការដឹកនាំរបស់ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្ត បានដាក់ចេញនូវវិធានការក្តៅ និងបទបញ្ជាដ៏ម៉ឺងម៉ាត់បំផុត ដើម្បីធានាសុវត្ថិភាពជូនប្រជាពលរដ្ឋ និងប្រែក្លាយខេត្តឱ្យក្លាយជាតំបន់មានស្ថិរភាព និងអភិវឌ្ឍន៍ប្រកបដោយចីរភាព។

ថ្លែងក្នុងឱកាសដឹកនាំកិច្ចប្រជុំការងារ ឯកឧត្តមអភិបាលខេត្ត បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់មន្ទីរអង្គភាពពាក់ព័ន្ធ និងអាជ្ញាធរក្រុង-ស្រុកទាំងអស់ ដែលបានអនុវត្តភារកិច្ចដោយមានការទទួលខុសត្រូវខ្ពស់ និងស្មារតីបម្រើប្រជាពលរដ្ឋយ៉ាងសកម្ម។

ជាមួយគ្នានេះ ឯកឧត្តមបានសង្កត់ធ្ងន់លើការអនុវត្តវិធានការក្តៅ ចំពោះក្រុមក្មេងទំនើងដែលបង្ហោះម៉ូតូបង្កការអសន្តិសុខតាមដងផ្លូវ ដោយបានបញ្ជាឱ្យសមត្ថកិច្ចអនុវត្តការឃាត់រក្សាទុកមធ្យោបាយយានយន្តចាប់ពី ៣ខែ ដល់ ៦ខែ ដោយគ្មានការលើកលែង ដើម្បីបង្កើនប្រសិទ្ធភាពក្នុងការរារាំង និងបង្កើតការរាងចាលក្នុងសង្គម។

បន្ថែមពីនេះ ឯកឧត្តមក៏បានណែនាំឱ្យបន្តអនុវត្តយ៉ាងតឹងរ៉ឹងនូវគោលនយោបាយ “ភូមិ-ឃុំ-សង្កាត់មានសុវត្ថិភាព” ដោយផ្តោតលើការបង្ក្រាបរាល់សកម្មភាពល្បែងស៊ីសងខុសច្បាប់គ្រប់ប្រភេទ ព្រមទាំងការបង្ក្រាបបទល្មើសឆបោកតាមប្រព័ន្ធអនឡាញ (Online Scam) ដែលកំពុងបង្កផលប៉ះពាល់ដល់សន្តិសុខសង្គម។

ក្នុងវិស័យចរាចរណ៍ ឯកឧត្តមអភិបាលខេត្ត បានជំរុញឱ្យស្នងការដ្ឋាននគរបាលខេត្ត បន្តរឹតបន្តឹងការត្រួតពិនិត្យ និងអនុវត្តច្បាប់ចរាចរណ៍ផ្លូវគោក ព្រមទាំងបន្តផ្សព្វផ្សាយអប់រំដល់ប្រជាពលរដ្ឋឱ្យមានការប្រុងប្រយ័ត្នខ្ពស់ ដោយគោរពតាមស្លោក “ពិសាគ្រឿងស្រវឹង សូមកុំបើកបរ” ដើម្បីកាត់បន្ថយគ្រោះថ្នាក់ចរាចរណ៍ឱ្យមានប្រសិទ្ធភាព។

ជាមួយនឹងការយកចិត្តទុកដាក់លើការអភិវឌ្ឍប្រកបដោយចីរភាព ឯកឧត្តមក៏បានជំរុញការពារបរិស្ថាន និងធនធានធម្មជាតិ ដោយណែនាំឱ្យបង្កើតសហគមន៍នេសាទតាមដងស្ទឹងព្រែកត្នោត និងរៀបចំប្រព័ន្ធគ្រប់គ្រងសំរាមនៅតាមរោងចក្រ សហគ្រាស ឱ្យបានត្រឹមត្រូវ ស្របតាមស្តង់ដារ ដើម្បីលើកកម្ពស់សោភ័ណភាពបរិស្ថាន និងសុខភាពសាធារណៈរបស់ប្រជាពលរដ្ឋនៅទូទាំងខេត្ត៕