ស្នងការនគរបាលខេត្តព្រៃវែងអំពាវនាវឲ្យពលរដ្ឋសហការ ស្វែងរករថយន្តបាត់បង់ ខណៈអាជ្ញាធរកំពុងពិនិត្យភាពស្របច្បាប់

(ព្រៃវែង)៖ លោកឧត្តមសេនីយ៍ទោ ឈឿន ប៊ុនឆន បានឲ្យដឹងនៅថ្ងៃនេះថា ករណីរថយន្តដឹកទំនិញ ដែលអាចស្របច្បាប់ ឬមិនស្របច្បាប់ កំពុងស្ថិតក្នុងដំណាក់កាលពិនិត្យ និងនឹងបញ្ជាក់ព័ត៌មានឲ្យបានច្បាស់ក្នុងពេលឆាប់ៗខាងមុខ។

ជាមួយគ្នានេះ លោកបានអំពាវនាវដល់ប្រជាពលរដ្ឋដែលធ្លាប់បាត់បង់រថយន្តដឹកទំនិញ ឲ្យធ្វើការទំនាក់ទំនងមកកាន់អង្គភាពនគរបាលខេត្តព្រៃវែង ដើម្បីសហការស្វែងរក និងផ្ទៀងផ្ទាត់ព័ត៌មានពាក់ព័ន្ធ។

លោកស្នងការបានបញ្ជាក់ផងដែរថា នគរបាលជាតិ និងនគរបាលខេត្តព្រៃវែង គឺជាជនជាតិខ្មែរ និងជាពលរដ្ឋដូចគ្នា ដូច្នេះមិនមានគោលនយោបាយ ឬសកម្មភាពណាមួយដែលប្រព្រឹត្តទៅក្នុងទម្រង់ជំរិត ឬទារុណកម្មលើប្រជាពលរដ្ឋឡើយ។ ការអនុវត្តភារកិច្ចរបស់កម្លាំងនគរបាល តែងផ្អែកលើគោលការណ៍គោរពក្រមសីលធម៌ វិជ្ជាជីវៈ និងបទបញ្ជាដែលជាអាទិភាពចម្បង ហើយមិនមានគោលដៅណាមួយយកប្រជាពលរដ្ឋជាសត្រូវនោះទេ។

លោកបានបញ្ជាក់ថា យុត្តិធម៌ និងការការពារសិទ្ធិរបស់ប្រជាពលរដ្ឋសុច្ចរិត នឹងត្រូវអនុវត្តដោយភាពត្រឹមត្រូវ និងតម្លាភាពក្នុងគ្រប់ករណី។

អាជ្ញាធរអំពាវនាវឲ្យប្រជាពលរដ្ឋបន្តសហការជាមួយនគរបាលខេត្តព្រៃវែង ដើម្បីធានាសុវត្ថិភាពសង្គម និងបង្កើនប្រសិទ្ធភាពក្នុងការស្វែងរករថយន្តដែលបានបាត់បង់៕