កម្លាំងអន្តរាគមន៍ បង្ក្រាបក្រុមក្មេងទំនើងប្រដេញកាប់គ្នាកណ្ដាលរាត្រី ឃាត់ខ្លួនជនសង្ស័យ ៥នាក់ ដកហូតអាវុធ និងវត្ថុតាងពាក់ព័ន្ធ

(ភ្នំពេញ)៖ នៅវេលាយប់អធ្រាត្រ ឈានចូលថ្ងៃទី៥ ខែមេសា ឆ្នាំ២០២៦ កម្លាំងអន្តរាគមន៍ និងតម្រួតបទបញ្ជា បន្ទាប់ពីបញ្ចប់ភារកិច្ចតាមគោលដៅអនុវត្តច្បាប់ចរាចរណ៍ពាក់ព័ន្ធនឹងការបើកបរជាអសកម្មក្រោមឥទ្ធិពលស្រវឹង បានដកកម្លាំងត្រឡប់មកអង្គភាពវិញ ស្រាប់តែប្រទះឃើញក្រុមក្មេងទំនើងមួយក្រុម កំពុងធ្វើសកម្មភាពប្រដេញកាប់គ្នា ប្រើប្រាស់ម៉ូតូប្រហែល៥គ្រឿង បង្កភាពអសន្តិសុខ និងភ័យខ្លាចដល់ប្រជាពលរដ្ឋតាមដងផ្លូវ។

ក្នុងស្ថានភាពបន្ទាន់ កម្លាំងសមត្ថកិច្ចបានចូលអន្តរាគមន៍ភ្លាមៗ ដោយធ្វើការឃាត់ខ្លួនជនសង្ស័យបានចំនួន ២នាក់ ព្រមទាំងដកហូតម៉ូតូ ១គ្រឿង ហើយបន្តដេញតាមក្រុមជនសង្ស័យដែលនៅសល់ រហូតដល់ចំណុចខាងក្រោយក្រសួងបរិស្ថាន ស្ថិតក្នុងសង្កាត់ទន្លេបាសាក់ ខណ្ឌចំការមន។

ក្នុងប្រតិបត្តិការបន្ត កម្លាំងបានឃាត់ខ្លួនជនសង្ស័យបន្ថែមចំនួន ៣នាក់ រួមជាមួយម៉ូតូ ១គ្រឿង និងដាវកែច្នៃចំនួន ១ដើម ដែលជាវត្ថុតាងប្រើប្រាស់ក្នុងសកម្មភាពហិង្សា។ ម៉ូតូដែលដកហូតរួមមាន៖ ម៉ាក Suzuki Nex ពាក់ស្លាកលេខ 1MJ-8734 ភ្នំពេញ និងម៉ាក Honda Dream ពាក់ស្លាកលេខ 1K-3577 ព្រះសីហនុ។ លើសពីនេះ សមត្ថកិច្ចក៏បានដកហូតទូរស័ព្ទចំនួន ៤គ្រឿងពីជនសង្ស័យផងដែរ។

បច្ចុប្បន្ន ជនសង្ស័យទាំង ៥នាក់ រួមជាមួយវត្ថុតាងពាក់ព័ន្ធ ត្រូវបានបញ្ជូនទៅកាន់ការិយាល័យជំនាញព្រហ្មទណ្ឌ ដើម្បីអនុវត្តនីតិវិធីតាមផ្លូវច្បាប់។

ប្រតិបត្តិការខាងលើ បង្ហាញពីការប្តេជ្ញាចិត្ត និងស្មារតីទទួលខុសត្រូវខ្ពស់របស់កម្លាំងសមត្ថកិច្ច ក្នុងការរក្សាសន្តិសុខ សុវត្ថិភាពសង្គម និងការពារសុខសន្តិភាពជូនប្រជាពលរដ្ឋ ទោះស្ថិតក្នុងពេលវេលាយប់ជ្រៅក៏ដោយ៕