ពលរដ្ឋបន្លឺសំឡេងថា “ដូចកើតម្ដងទៀត” ក្រោយទទួលការយកចិត្តទុកដាក់ពីអាជ្ញាធរ! ឧត្តមសេនីយ៍ត្រី ម៉េង ស្រ៊ុន ដឹកនាំក្រុមការងារ ចុះជួយកុមារកំព្រា៣នាក់ នៅស្រុកគងពិសី

(កំពង់ស្ពឺ)៖ ក្នុងបេសកកម្មមនុស្សធម៌ប្រកបដោយវិជ្ជាជីវៈ និងគោរពក្រមសីលធម៌ខ្ពស់ នាព្រឹកថ្ងៃទី០៤ ខែមេសា ឆ្នាំ២០២៦ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានដឹកនាំក្រុមការងារ ចុះទៅសួរសុខទុក្ខ និងផ្តល់ការឧបត្ថម្ភជាក់ស្តែង ដល់កុមារកំព្រាឪពុកម្តាយ៣នាក់បងប្អូន ដែលកំពុងជួបការលំបាកក្នុងជីវភាពរស់នៅ ប្រចាំថ្ងៃ នៅភូមិចាម ឃុំវាល ស្រុកគងពិសី ខេត្តកំពង់ស្ពឺ។

បេសកកម្មនេះ បានអនុវត្តឡើងបន្ទាប់ពីទទួលបានព័ត៌មានពីមូលដ្ឋាន ដោយមានការចូលរួមយ៉ាងសកម្មពីក្រុមការងារកងរាជអាវុធហត្ថខេត្ត ក្រុមការងារសហភាពសហព័ន្ធយុវជនខេត្ត និងអ្នកស្ម័គ្រចិត្តកាកបាទក្រហមកម្ពុជាខេត្ត ដែលបានបង្ហាញពីសាមគ្គីភាព និងការទទួលខុសត្រូវរួមក្នុងសង្គម។

កុមារកំព្រាទាំង៣នាក់ រួមមាន ក្មេងស្រីអាយុ១៣ឆ្នាំ និងក្មេងប្រុសអាយុ១០ឆ្នាំ និង៦ឆ្នាំ កំពុងរស់នៅក្នុងស្ថានភាពខ្វះខាត ឥតមានការថែទាំពីឪពុកម្តាយ។ ទោះជាយ៉ាងណា ក្តីសង្ឃឹមបានត្រឡប់មកវិញ នៅពេលដែលអាជ្ញាធរចុះដល់ទីកន្លែង និងផ្តល់ជំនួយជាក់ស្តែង។

ក្នុងឱកាសនោះ លោកឧត្តមសេនីយ៍ត្រី ម៉េង ស្រ៊ុន ដោយមានចិត្តមេត្តាករុណា និងអារម្មណ៍អាណិតអាសូរ បានផ្តល់ថវិកា ៣០០,០០០រៀល ព្រមទាំងសម្ភារៈប្រើប្រាស់ប្រចាំថ្ងៃរួមមាន អង្ករ មី ទឹកសុទ្ធ ទឹកត្រី ទឹកស៊ីអ៊ីវ និងអាហារស្រាលផ្សេងៗ។ ជាពិសេស ក៏បានផ្តល់សម្ភារៈសិក្សា និងឯកសណ្ឋានសិស្ស ដើម្បីជួយលើកទឹកចិត្តឱ្យកុមារទាំងនេះបន្តការសិក្សា និងកសាងអនាគតរបស់ខ្លួន។

សកម្មភាពនេះ បានបង្កើតអារម្មណ៍កក់ក្តៅ និងសង្ឃឹមឡើងវិញចំពោះគ្រួសារទទួលជំនួយ ដោយពលរដ្ឋមូលដ្ឋានបានបន្លឺសំឡេងថា «ដូចកើតម្ដងទៀត» បង្ហាញពីការសប្បាយរីករាយ លាយទឹកភ្នែក និងការស្គាល់តម្លៃនៃការយកចិត្តទុកដាក់ពីសំណាក់អាជ្ញាធរ។

គួរបញ្ជាក់ថា សកម្មភាពមនុស្សធម៌ដ៏មានន័យនេះ មិនត្រឹមតែជាការជួយសង្គ្រោះជីវភាពបឋមប៉ុណ្ណោះទេ ប៉ុន្តែថែមទាំងបង្ហាញពីតួនាទី និងភារកិច្ចដ៏ខ្ពង់ខ្ពស់របស់កងកម្លាំងអាវុធហត្ថ ក្នុងការបម្រើប្រជាពលរដ្ឋដោយស្មោះត្រង់ និងមានទំនួលខុសត្រូវ។

ជាមួយគ្នានេះ ក៏ជាការអនុវត្តជាក់ស្តែងតាមទិសស្លោកដ៏មានអត្ថន័យរបស់ឯកឧត្តម នាយឧត្តមសេនីយ៍ សៅ សុខា ដែលបានណែនាំថា «ចំពោះជាតិត្រូវតែការពារ ចំពោះប្រជាត្រូវតែបម្រើ ច្បាប់ត្រូវតែគោរព បទល្មើសត្រូវតែបង្ក្រាប ជួយគិត ជួយធ្វើ និងរួមគ្នាទទួលខុសត្រូវ»។

សកម្មភាពដ៏គួរឱ្យគោរពនេះ គឺជាគំរូល្អមួយក្នុងសង្គម ដែលបញ្ជាក់ថា ការធ្វើល្អ ទោះមិនឃើញផលភ្លាមៗ ក៏នៅតែមានតម្លៃ និងអាចបង្កើតការផ្លាស់ប្តូរជីវិតមនុស្សបានពិតប្រាកដ៕

IMG_1234