បង្ក្រាបទីតាំងសង្ស័យ Online Scam នៅខណ្ឌកំបូល ឃាត់ខ្លួនជនបរទេស១៤នាក់ និងដកហូតឧបករណ៍ជាច្រើន

(ភ្នំពេញ)៖ កម្លាំងសមត្ថកិច្ចរាជធានីភ្នំពេញ បានចុះបង្ក្រាបទីតាំងសង្ស័យពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scam) មួយកន្លែង ស្ថិតនៅក្នុងបុរីកំបូលស៊ីធី ផ្ទះលេខ៦២C ផ្លូវលេខ០២ សង្កាត់កន្ទោក ខណ្ឌកំបូល កាលពីថ្ងៃទី០៤ ខែមេសា ឆ្នាំ២០២៦ ដោយឃាត់ខ្លួនជនបរទេសសរុបចំនួន១៤នាក់។

ប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យជាបុរសជនជាតិបង់ក្លាដេសចំនួន៥នាក់ និងជនជាតិប៉ាគីស្ថានចំនួន៩នាក់ បន្ទាប់ពីរកឃើញការស្នាក់នៅមិនប្រក្រតី និងសង្ស័យពាក់ព័ន្ធនឹងសកម្មភាពឆបោកតាមប្រព័ន្ធអនឡាញ។

ក្នុងការចុះបង្ក្រាបខាងលើ សមត្ថកិច្ចបានដកហូតវត្ថុតាងជាច្រើន រួមមាន ទូរសព្ទដៃចំនួន៥៧គ្រឿង កុំព្យូទ័រប្រភេទ All-in-One ចំនួន០៥គ្រឿង និងស៊ីមកាតបរទេសមួយចំនួនធំ ដែលត្រូវបានសង្ស័យប្រើប្រាស់ក្នុងសកម្មភាពបទល្មើស។

ប្រតិបត្តិការនេះ បានអនុវត្តក្រោមការបញ្ជាដ៏ខ្ពង់ខ្ពស់របស់លោក ឃួង ស្រេង អភិបាលរាជធានីភ្នំពេញ និងលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដោយមានការចូលរួមពីអាជ្ញាធរខណ្ឌកំបូល និងសម្របសម្រួលនីតិវិធីដោយលោក សូ សុវិទ្យា ព្រះរាជអាជ្ញារង អមសាលាដំបូងរាជធានីភ្នំពេញ។

តាមលទ្ធផលស្រាវជ្រាវដំបូង សមត្ថកិច្ចបានរកឃើញថា ជនសង្ស័យទាំងនេះ បានប្រើប្រាស់ទឹកដីកម្ពុជា ជាគោលដៅប្រព្រឹត្តបទល្មើសឆបោកតាមប្រព័ន្ធអនឡាញ ក្រោមរូបភាពផ្តល់ការងារ ដើម្បីបោកប្រាស់ជនរងគ្រោះ។

បច្ចុប្បន្ន ជនសង្ស័យជនបរទេសទាំង១៤នាក់ រួមនឹងវត្ថុតាងទាំងអស់ ត្រូវបានកម្លាំងជំនាញនាំយកទៅកាន់ស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីសាកសួរ និងចាត់ការតាមផ្លូវច្បាប់យ៉ាងតឹងរ៉ឹង។

អាជ្ញាធរនិងសមត្ថកិច្ចក៏បានអំពាវនាវដល់ប្រជាពលរដ្ឋ ឱ្យមានការប្រុងប្រយ័ត្នខ្ពស់ចំពោះការផ្សព្វផ្សាយការងារតាមប្រព័ន្ធអនឡាញ ដែលមិនមានប្រភពច្បាស់លាស់ ដើម្បីជៀសវាងការធ្លាក់ជាជនរងគ្រោះនៃបទល្មើសឆបោកបច្ចេកវិទ្យា៕