រដ្ឋមន្ត្រីបរិស្ថានបើកស៊ើបអង្កេតករណីពាក់ព័ន្ធការយកលុយពីរោងចក្រ បង្ហាញជំហរមិនអត់ឱនចំពោះអំពើពុករលួយ

(ភ្នំពេញ)៖ លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានប្រកាសបើកការស្រាវជ្រាវស្វែងរកការពិតលើករណីមន្ត្រីមន្ទីរបរិស្ថានខេត្តកំពង់ស្ពឺ ត្រូវបានចោទប្រកាន់ថា បានទាមទារប្រាក់ពីរោងចក្រកែច្នៃដំណាប់ស្វាយ ជាថ្នូរនឹងការធ្វើរបាយការណ៍វាយតម្លៃមិនល្អ។

ការប្រកាសយ៉ាងតឹងរ៉ឹងនេះ ត្រូវបានធ្វើឡើងក្នុងបរិបទមានការបែកធ្លាយសំឡេងពាក់ព័ន្ធនឹងការទាមទារប្រាក់ចំនួន ១៥០០ដុល្លារ មុននឹងមានការចរចាចុះត្រឹម ៦០០ដុល្លារ។ ដើម្បីធានាថាការស្រាវជ្រាវមានតម្លាភាព និងឯករាជ្យ លោករដ្ឋមន្ត្រីបានបញ្ជាក់ថា អាចនឹងបញ្ជូនសំណុំរឿងទៅកាន់តុលាការ ឬអង្គភាពប្រឆាំងអំពើពុករលួយ ដើម្បីអនុវត្តតាមនីតិវិធីច្បាប់។

លោក អ៊ាង សុផល្លែត បានបញ្ជាក់យ៉ាងច្បាស់ថា ក្រសួងបរិស្ថានមិនអនុញ្ញាតឱ្យមានអំពើខុសច្បាប់ណាមួយកើតឡើងក្នុងជួរមន្ត្រីឡើយ ហើយនឹងមិនទុកឱ្យករណីនេះបញ្ចប់ដោយគ្មានការទទួលខុសត្រូវ។ «មន្ត្រីដែលប្រព្រឹត្តខុស ត្រូវទទួលខុសត្រូវ តែបើមិនបានប្រព្រឹត្តខុស នឹងទទួលបានយុត្តិធម៌» លោករដ្ឋមន្ត្រីបានលើកឡើង។

ជាមួយគ្នានេះ មន្ទីរបរិស្ថានខេត្តកំពង់ស្ពឺ ក៏បានចេញលិខិតបដិសេធការចោទប្រកាន់ខាងលើ ដោយអះអាងថា សកម្មភាពចុះពិនិត្យរបស់មន្ត្រី គឺធ្វើឡើងស្របតាមតួនាទី និងភារកិច្ច ដើម្បីដោះស្រាយបញ្ហាបំពុលបរិស្ថាន បន្ទាប់ពីមានការលើកឡើងក្នុងវេទិកាសាធារណៈកាលពីចុងខែមីនា ឆ្នាំ២០២៦។

ក្នុងនីតិកាលទី៧នេះ ក្រសួងបរិស្ថាន ក្រោមការដឹកនាំរបស់លោករដ្ឋមន្ត្រី បានដាក់ចេញវិធានការជាក់ស្តែងជាច្រើន ដើម្បីទប់ស្កាត់ការបំពុលទឹក និងការបង្ហូរទឹកកខ្វក់ពីរោងចក្រទៅប៉ះពាល់ដល់បរិស្ថានសាធារណៈ។ ការចាប់ផ្តើមស្រាវជ្រាវលើករណីនេះ ត្រូវបានមើលឃើញថា ជាសញ្ញាបង្ហាញពីការប្តេជ្ញាចិត្តរឹងមាំក្នុងការពង្រឹងវិន័យរដ្ឋបាល និងបង្កើនភាពជឿជាក់ពីសាធារណជន។

មហាជនបានសម្តែងការគាំទ្រចំពោះជំហរដ៏តឹងរ៉ឹងនេះ ដោយចាត់ទុកថា ជាការពារសេចក្តីថ្លៃថ្នូររបស់មន្ត្រីស្អាតស្អំ និងជាការបោសសំអាតមន្ត្រីខិលខូច ដែលអាចប៉ះពាល់ដល់កិត្តិយសរបស់ស្ថាប័ន និងការអនុវត្តន៍គោលនយោបាយរដ្ឋាភិបាលក្នុងវិស័យបរិស្ថាន៕